15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ի՞նչ հարցեր է քննարկելու Սալոմե Զուրաբիշվիլին հայաստանյան հանդիպումների ընթացքում
Քաղաքականություն
12.03.2019 | 20:42
Վրաստանի նախագահ Սալոմե Զուրաբիշվիլին Հայաստան կատարելիք առաջին պաշտոնական այցի ընթացքում կարող է բարձրացնել հայ-վրացական սահմանի սահմանազատման հարցը: «Սպուտնիկ Գրուզիա»-ին այս մասին ասել է Հայաստանում Վրաստանի առաջին դեսպան, Սամցխե Ջավախքի նախկին նահանգապետ Գիգլա Բարամիձեն:
Զուրաբիշվիլին, հիշեցնենք, Հայաստան կժամանի վաղը՝ մարտի 13-ին: Սա պետության ղեկավարի պաշտոնում նրա առաջին այցն է Երևան: Մինչ այդ, նա եղել է նաև Ադրբեջանում, որտեղ նույնպես հանդես է եկել սահմանազատման աշխատանքներն ավարտին հասցնելու նախաձեռնությամբ:
Ներկայում Վրաստանը սահմանազատման խնդիրներ չունի միայն Թուրքիայի հետ: Հարևան մյուս երկրների հետ դեռևս վիճելի հարցեր կան:
«Երբ ես Հայաստանում Վրաստանի արտակարգ և լիազոր դեսպանն էի, այդ հարցը բարձրացրել եմ: Մեր հայ գործընկերների հետ աշխատել ենք, բոլոր հարցերը գրեթե 70%-ով լուծել, բայց հետո, չգիտես ինչու, անցան տասնամյակներ և ամեն ինչ դադարեցվեց»,- ասել է Գիգլա Բարամիձեն:
Հայաստանում Սալոմե Զուրաբիշվիլին հանդիպելու է իր պաշտոնակից Արմեն Սարգսյանի, վարչապետ Նիկոլ Փաշինյանի հետ: Այցի ծրագիրը նախատեսում է նաև հանդիպում Ամենայն Հայոց կաթողիկոսի հետ: Գարեգին 2-րդի հետ հանդիպումը նախկին դիվանագետը չափազանց կարևոր է համարում:
Արևելագետ Վասիլի Պապավան էլ օրինաչափ է համարում, որ Վրաստանի նախագահը Երևան է գալիս Բաքու կատարած այցից հետո: «Եթե առաջին այցը լիներ Երևան, դա տարօրինակ կլիներ և զարմանք կառաջացներ ինչպես Թուրքիայում, այնպես էլ Ադրբեջանում, քանի որ տարածաշրջանում Վրաստանի հիմնական առևտրատնտեսական գործընկերները Ադրբեջանն ու Թուրքիան են»,- ասել է փորձագետը:
Իսկ Հայաստան այցը, Պապավայի խոսքով, բարեկամական հարաբերությունների ցուցադրություն կլինի:
«Վրաստանը մտերիմ կապեր ունի Թուրքիայի և Ադրբեջանի հետ, որոնց հետ լարված հարաբերություններ ունի Հայաստանը: Բայց Վրաստանը լավ հարաբերություններ ունի նաև Հայաստանի հետ, այդ պատճառով այցը զուտ բարեկամական ժեստ է»,- ասել է Պապավան:
