ԱԱԾ-ն արձագանքում է Դավիթ Սանասարյանի կոչին

Փետրվարի 28-ին կայացած Կառավարության նիստից հետո ՀՀ պետական վերահսկողական ծառայության պետ Դավիթ Սանասարյանը, խոսելով ՊՎԾ կալանավորված աշխատակիցների մասին, կոչով դիմեց ԱԱԾ-ին՝ ասելով. «ԱԱԾ-ի իմ գործընկերներին արդեն կոչ եմ արել, մեկ անգամ ևս կոչ եմ անում, որ նախաքննական փուլում պահեն գաղտնիությունը։ Որևիցե «մուտիլովկայով» հայտնի մարդկանց ձեռքում նման ինֆորմացիա չպետք է հայտնվի։

Մեր լրատվական ծառայությունը չի կարող ԱԱԾ լրատվականի դերը կատարել։ Եթե գործ կա, ԱԱԾ-ն պետք է տեղեկացնի»։

Factor.am-ը գրավոր հարցում էր ուղարկել ԱԱԾ՝ պարզելու, թե ով է եղել տեղեկատվական արտահոսքի հեղինակը, արդյո՞ք ԱԱԾ-ն պատրաստվում է, հետևելով այս կոչին, իրականացնել ծառայողական քննություն։ ԱԱԾ-ից ստացել ենք հետևյալ պատասխանը. «ՀՀ ԱԱԾ-ում տեղեկատվական արտահոսք տեղի չի ունեցել, հետևաբար՝ ծառայողական քննություն անցկացնելու կամ այլ քայլեր ձեռնարկելու անհրաժեշտությունը բացակայում է»։

ԱԱԾ-ից հետաքրքրվել էինք նաև, թե գիտե՞ն՝ ում նկատի ուներ Դավիթ Սանասարյանը՝ «մուտիլովկայով» հայտնի մարդիկ ասելով:

«Թե ի՞նչ և ո՞ւմ նկատի ուներ ՀՀ պետական վերահսկողական ծառայության պետ Դավիթ Սանասարյանը, ապա այդ կապակցությամբ անհրաժեշտ է դիմել իրեն»,- ասված է պատասխանում։

Հիշեցնենք, որ փետրվարի 27-ին մամուլը գրեց, որ ՊՎԾ չորս աշխատակիցներ ձերբակալվել են, ավելի ուշ ԱԱԾ-ն հայտարարեց, որ ոչ թե չորս, այլ ՊՎԾ երկու աշխատակից և նրանց հետ փոխկապակցված ընկերության ներկայացուցիչ է կալանավորվել: ՊՎԾ աշխատակիցները մեղադրվում են ՀՀ Քրեական օրենսգրքի 308-րդ հոդվածի 2-րդ մասի (պաշտոնեական լիազորությունների չարաշահումը, որն առաջացրել է ծանր հետևանքներ), ինչպես նաև 325-րդ հոդվածի 2-րդ մասի (մի խումբ անձանց կողմից փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշեր կեղծելը, իրացնելը կամ օգտագործելը) հատկանիշներով:

Լիլիթ Շաբոյան