Դավիթ Սանասարյանը դատարան չներկայացավ. նիստը հետաձգվեց

Երևանի ընդհանուր իրավասության դատարանի Ավան և Նոր Նորք վարչական շրջանների նստավայրում կայացավ «Հայաստանի կառուցողական» կուսակցության նախագահ Անդրիաս Ղուկասյանի գործով դատական նիստը՝ դատավոր Վարդան Գրիգորյանի նախագահությամբ:

Այսօրվա նիստին որպես վկա դատարան էին հրավիրվել ՊՎԾ պետ Դավիթ Սանասարյանը, «Ժառանգություն» կուսակցության վարչության նախագահ Արմեն Մարտիրոսյանը և մեկ այլ գործով մեղադրյալ Գևորգ Մելքոնյանը։ Վերջիններս դատական նիստին չէին ներկայացել։ Ծանուցման վերաբերյալ հավաստում կար միայն Դավիթ Սանասարյանի վերաբերյալ:

«Ժառանգություն» կուսակցության վարչության նախագահ Արմեն Մարտիրոսյանը, հիշեցնենք, խորհրդարանական ընտրություններից հետո ընտանիքի հետ հեռացել է Հայաստանից, ըստ մամուլի՝ նա Կանադա է մեկնել՝ մշտական բնակության: Դատարանը որոշեց մինչև հաջորդ դատական նիստը Արմեն Մարտիրոսյանի՝ երկրում չգտնվելու վերաբերյալ տեղեկությունը հաստատելու համար գրություն ուղարկել ՀՀ ոստիկանության քրեական հետախուզության գլխավոր վարչությանը: Դատարանը պաշտոնական գրություն կուղարկի նաև Դավիթ Սանասարյանին, ինչպես նաև բերման կենթարկի Գևորգ Մելքոնյանին:

Հիշեցնենք, որ 2016 թվականի Սարի թաղի դեպքերի ժամանակ «Ժառանգություն» կուսակցության անդամներ Դավիթ Սանասարյանը, Արմեն Մարտիրոսյանը, Հովսեփ Խուրշուդյանը և «Նոր Հայաստան» շարժման անդամ Անդրիաս Ղուկասյանը կալանավորվել էին: Բոլորը՝ բացառությամբ Անդրիաս Ղուկասյանի, կասկածվում էին զանգվածային անկարգություններ կազմակերպելու համար: Հովսեփ Խուրշուդյանը անազատության մեջ մնաց 27 օր, Արմեն Մարտիրոսյանը՝ 21, իսկ Դավիթ Սանասարյանը՝ 22 օր: Ավելի ուշ նրանց կարգավիճակը կասկածյալից փոխվեց վկայի: Մինչև 2018 թվականի մայիսի 7-ն անազատության մեջ մնաց միայն Անդրիաս Ղուկասյանը, նրան մեղադրանք առաջադրվեց 2016 թվականի հուլիսի 29-ին Սարի թաղում զանգվածային անկարգություններ կազմակերպելու համար։

Գործով հաջորդ դատական նիստը տեղի կունենա ապրիլի 9-ին ժամը 12:00-ին:

Լիլիթ Շաբոյան