28.09.2026 | 15:29
Զելենսկին հայտնել է, որ Կիևի մարզին ռուսական հարվածի հետևանքով Ադրբեջանի քաղաքացի է զոհվել
Պոլսո Հայոց պատրիարքարանում մինչև Սուրբ Զատիկ ազգային-եկեղեցական սուգ է հայտարարվել
Քաղաքականություն
11.03.2019 | 12:09
Պոլսո Հայոց պատրիարք Մեսրոպ արքեպիսկոպոս Մութաֆյանի մահվան կապակցությամբ, Պատրիարքական ընդհանուր փոխանորդ Արամ արքեպիսկոպոս Աթեշյանի տնօրինությամբ, մինչև Սուրբ Զատկի ճրագալույցի Սուրբ պատարագը՝ ապրիլի 20-ը, պատրիարքարանում ազգային-եկեղեցական սուգ է հայտարարվել: Այդ մասին տեղեկանում ենք Պոլսո Հայոց պատրիարքարանից:
Այդ ընթացքում եկեղեցական, շրջանային կամ համայնքային կազմակերպություններում ոչ կրոնական բնույթի միջոցառումները կչեղարկվեն կամ կհետաձգվեն:
Մինչև մարտի 17-ը Պոլսո հայկական բոլոր եկեղեցիներում առավոտյան և երեկոյան ժամերգությունների ընթացքում զանգերը կղողանջեն 5 րոպե տևողությամբ՝ ազդարարելով սուգը: Իսկ մինչ սգո ավարտը եկեղեցիներում բոլոր պատարագների ավարտին կկատարվի հատուկ կարգ՝ պատրիարքի հոգու հանգստության համար: Մարտի 11-16-ը Պատրիարքարանում սգո մատյան կբացվի:
Հանգուցյալ Պոլսո Հայոց պատրիարքին վերջին հարգանքի տուրքը կմատուցեն մարտի 14-ին և 15-ին, աթոռանիստ Սուրբ Աստվածածին եկեղեցում:
Հիշեցնենք, որ Պոլսո Հայոց պատրիարք Մեսրոպ արքեպիսկոպոս Մութաֆյանը վախճանվեց մարտի 8-ին 62 տարեկանում:
