02.07.2026 | 17:15
Ղրղզստանը հարևան երկրներից վառելիք է խնդրում․ երկիրը բենզինի 90%-ը ստանում է Ռուսաստանից
Եվրախորհրդարանի ընտրություններից հետո ՀՀ-ի հետ հարաբերություններում կտրուկ շրջադարձ սպասել պետք չէ. պատգամավոր. ՏԵՍԱՆՅՈՒԹ
Քաղաքականություն
07.03.2019 | 14:07
Սպասել, որ Եվրախորհրդարանի ընտրություններից հետո կտրուկ շրջադարձ կլինի նաև Հայաստանի հետ հարաբերություններում, պետք չէ: «Հայաստան-Եվրամիություն համաձայնագրի կիրարկման հեռանկարները» թեմայով քննարկման ժամանակ նման կարծիք հայտնեց ԱԺ «Իմ քայլը» խմբակցության պատգամավոր Կարեն Սիմոնյանը՝ անդրադառնալով վարչապետ Նիկոլ Փաշինյանի՝ ԵԽ ընտրություններից առաջ Բրյուսել այցի նպատակահարմարության մասին հարցին:
«Ընդհանուր Եվրամիության քաղաքականությունը կտրուկ փոփոխությունների չի ենթարկվում: Եթե մենք վերլուծենք վերջին 30 տարվա ընթացքում տեղի ունեցած քաղաքական շրջադարձերը, կտրուկ ոչինչ չի փոփոխվել: Այսինքն՝ ընտրություններից հետո ընդհանուր արտաքին քաղաքական, ներքին քաղաքական կամ այլ ոլորտներում փոփոխությունը շատ կտրուկ չի եղել: Եվ սպասել, որ Եվրախորհրդարանի ընտրություններից հետո կտրուկ շրջադարձ կլինի նաև Հայաստանի հետ հարաբերություններում, պետք չէ»,- ասաց Սիմոնյանը:
Պատգամավորը կարծում է, որ այս հանդիպումների առիթը բաց թողնել պետք չէր. «Մենք կողմ ենք ցանկացած հանդիպման, որը Հայաստանին տալիս է նոր քաղաքական, տնտեսական, մշակութային հնարավորություններ: Ինչքան շատ շփումներ լինեն բարձր մակարդակով ԵՄ-ի հետ, այնքան ավելի դրական փոփոխություններ կլինեն»:
Սակայն, ըստ Կարեն Սիմոնյանի, մի բան է պայմանավորվածություններ ձեռք բերելը, այլ բան՝ դրանց կիրարկումը: «Այսինքն՝ կիրառումը պետք է համապատասխանի այն սպասումներին, որոնք ձևավորվում են այդ հանդիպումների ընթացքում: Հետևաբար՝ մենք պետք է ավելի շատ ուշադրություն դարձնենք ոչ միայն բուն հանդիպումներին, ընդհանուր հայտարարություններին, այլ նաև դրանցից հետո կատարվող գործողություններին»,- հավելեց պատգամավորը:
Մանրամասները՝ տեսանյութում:
