Քաղաքականություն
05.03.2019 | 19:55
ԱՄՆ Կոնգրեսի Ներկայացուցիչների պալատը նոր հետաքննություն է սկսել նախագահ Դոնալդ Թրամփի դեմ:
Այս անգամ հետաքննությունը փաստեր է հավաքում ԱՄՆ ղեկավարի կողմից իշխանության չարաշահման, կոռուպցիայի, արդարադատությանը խոչընդոտելու և լիազորությունների չարաշահման հնարավոր փորձերի մասին, հայտնում է BBC-ի ռուսական ծառայությունը:
ԱՄՆ նախագահի դեմ նոր հետաքննություն սկսելու պատճառներից մեկը նրա նախկին իրավաբան Մայքլ Քոենի ցուցմունքն է:
Փետրվարի 27-ին Կոնգրեսում ունեցած ելույթի ընթացքում ԱՄՆ նախագահի նախկին իրավաբանը Թրամփին ռասիստ և սրիկա էր անվանել՝ նշելով, որ ամաչում է նրա կողմից իրականացված անօրինական գործողություններին մասնակցելու համար։
Թրամփին առնչվող նոր հետաքննությունը վարում է Ներկայացուցիչների պալատի իրավաբանական հանձնաժողովը՝ դեմոկրատ Ջերալդ Նադլերի ղեկավարությամբ:
Երկուշաբթի՝ մարտի 4-ին խորհրդարանական հետաքննության շրջանակում ավելի քան 80 կազմակերպություն և ֆիզիկական անձ հարցում է ստացել: «Նախագահ Թրամփը, ըստ էության, ակնհայտորեն քայլեր է ձեռնարկել՝ թաքցնելու Վլադիմիր Պուտինի հետ իր կապերը վարչակազմի այլ անդամներից, Կոնգրեսից և Ամերիկայի ժողովրդից»,- ասվում է կոնգրեսականների հարցման մեջ:
Միաժամանակ, դեմոկրատ կոնգրեսականները Սպիտակ տնից պահանջել են տեղեկատվություն տրամադրել Պուտին-Թրամփ հանդիպման մասին, որը Թրամփը, ենթադրաբար, թաքցրել է:
Սպիտակ տունն իր հերթին Կոնգրեսում դեմոկրատների կողմից ԱՄՆ նախագահ Դոնալդ Թրամփի դեմ սկսված նոր հետաքննությունն անվանել է «ամոթալի» և «վիրավորական»: Այս մասին հայտարարել է Սպիտակ տան մամուլի խոսնակ Սառա Սանդերսը: Նրա խոսքով՝ Ներկայացուցիչների պալատի իրավաբանական հանձնաժողովն «ամոթալի և վիրավորական հետաքննություն» է սկսել: Սառա Սանդերսը նաև նշել է, որ դեմոկրատներն այս քայլին են դիմել, քանի որ վախենում են, թե «Ռուսաստանի հետ պայմանավորվածության» մասին իրենց երկու տարվա կեղծ պատմությունը ջրի երես դուրս կգա:
ԱՄՆ նախագահի դեմ լայնածավալ հետաքննության շրջանակում Կոնգրեսը փաստաթղթեր է պահանջել նաև ՌԴ նախագահ Վլադիմիր Պուտինի հետ կապ ունեցող գործարար Եվգենի Պրիգոժինի ընկերությունից և միլիարդատեր Վիկտոր Վեկսելբերգից։
Նելլի Մելքոնյան
