30.05.2026 | 18:22
Իրանը հարված է հասցրել Քուվեյթում գտնվող ամերիկյան ավիաբազային․ լրատվամիջոց
ՀԱՊԿ-ում անառողջ իրավիճակ է. Ալեքսանդր Լուկաշենկո
Քաղաքականություն
05.03.2019 | 13:54
Բելառուսի նախագահ Ալեքսանդր Լուկաշենկոն հայտարարել է, որ Մինսկի հմար միջազգային փոխգործակցության կարևոր հարց է ՀԱՊԿ շրջանակում ռազմաքաղաքական համագործակցությունը: ԲԵԼՏԱ-ի փոխանցմամբ՝ Բելառուսի նախագահն այս մասին խոսել է ինտեգրացիոն կառույցներին մասնակցության և միջազգային կազմակերպությունների հետ համագործակցության հարցերով խորհրդակցության ժամանակ:
«Այսօր դա կարևորագույն ուղղությունն է, որտեղ պետք է կենտրոնացնենք մեր բոլոր ջանքերը՝ կապված այն միտումների հետ, որոնք ընդհանուր առմամբ զարգանում են ռազմաքաղաքական ոլորտում: Հատկապես այն բանից հետո, երբ երկու խոշորագույն միջուկային գերտերություններ դուրս եկան Միջին և փոքր հեռահարության հրթիռների ոչնչացման մասին պայմանագրից: Հաշվի առնելով համաշխարհային միտումները՝ այս կազմակերպության պահանջվածությունը կասկած չի հարուցում: Սակայն ներկայում ՀԱՊԿ-ում անառողջ իրավիճակ է առաջացել: Վերցնենք թեկուզ սովորական հարց՝ գլխավոր քարտուղարի նշանակումը»,- հայտարարել է Լուկաշենկոն:
Հիշեցնենք, որ Բելառուսը ՀԱՊԿ գլխավոր քարտուղարի պաշտոնում առաջարկում է իր թեկնածուին՝ երկրի Անվտանգության խորհրդի պետքարտուղար Ստանիսլավ Զասին:
Ռուսաստանը, Ղազախստանը, Տաջիկստանն ու Ղրղզստանն արդեն հանդիպել են Զասին և համաձայնեցրել նրա թեկնածությունը: Հայաստանի վարչապետը Բելառուսի թեկնածուին դեռևս չի հանդիպել:
