«Հաց բերողի» մահվան գործի մի դրվագը ՀՔԾ-ն կարճել է, մյուս մասը՝ ետ է ուղարկել ՔԿ քննության

ՊՊԾ գործով մեղադրյալ ճանաչված և 2017 թվականին մահացած Արթուր Սարգսյանի՝  Հաց բերողի գործի մի մասը Հատուկ քննչական ծառայությունը կարճել է, իսկ մյուս մասը՝ ետ է ուղարկվել ՀՀ քննչական կոմիտե՝ քննության։ Տեղեկությունը Factor.am-ին  փոխանցեց ՀՔԾ մամուլի խոսնակ Մարինա Օհանջանյանը։

ՀՀ քննչական կոմիտեի հասարակայնության հետ կապերի և տեղեկատվության բաժնի պետի պաշտոնակատար Նաիրա Հարությունյանն էլ տեղեկացրեց, որ քրգործը ՔԿ-ն ստացել է և շարունակվում է դրա նախաքննությունը:

Հիշեցնենք, որ Արթուր Սարգսյանի գործով Քննչական կոմիտեում հարուցվել էր քրեական գործ` ՀՀ քրեական օրենսգրքի 130-րդ հոդվածի 2-րդ մասով, այն է՝ բժշկական օգնություն ու սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահը:

Քրեական գործով նշանակել էր հանձնաժողովային դատաբժշկական փորձաքննություն` մահվան պատճառը պարզելու համար: 2018 թվականի ամռանը Քննչական կոմիտեն հայտարարեց, որ Արթուր Սարգսյանի մահը վրա է հասել բազմաօրգանային անբավարարությունից: Բացի այդ, պարզվել էր, որ նա տառապել է «Բեխտերևի» հիվանդությամբ, սակայն թիվ 226/հձ եզրակացության համաձայն՝ ինչպես «Նուբարաշեն», այնպես էլ «Դատապարտյալների հիվանդանոց» քրեակատարողական հիմնարկներում նշված հիվանդության, ինչպես քրոնիկական սիրտ-թոքային ախտաբանության կապակցությամբ բուժում չի իրականացվել:

21.12.2016թ-ին «Դատապարտյալների հիվանդանոց» ՔԿՀ-ում Արթուր Սարգսյանի մոտ գրանցվել է քրոնիկական բրոնխիտի առկայություն, որի թարախային բնույթը հետագայում հաստատվել է 15.03.2017 թ–ին` «Արմենիա» ԲԿ-ում ֆիբրոսկոպիկ ինտուբացիա կատարելիս: Իսկ դիակի դատաբժշկական փորձաքննության ընթացքում հայտնաբերվել է թոքաբորբ, որի զարգացմանը կարող էր նպաստել շնչառական ֆունկցիայի խանգարմամբ ուղեկցվող «Բեխտերևի» հիվանդությունը և որի առաջացման վաղեմությունը կազմում է մահվանից առաջ առնվազն 3-4 օր:

Աղավնի Սուքիասյան