Քաղաքականություն
28.02.2019 | 18:02
Նիկոլ Փաշինյանն առաջիկայում Իլհամ Ալիևի հետ հանդիպում կունենա։ Այս մասին ՀՀ վարչապետը խոսել է Իրանի հայ համայնքի ներկայացուցիչների հետ հանդիպման ժամանակ։
Փաշինյանը նշել է, որ Հայաստանի կառավարության առաջնային խնդիրներից մեկը բանակցային գործընթացքում Արցախի սուբյեկտայնության բարձրացումն է։
«Մենք շարունակելու ենք հետապնդել Արցախի ինքնորոշման իրավունքի ճանաչումը։ Առաջիկայում պետք է հանդիպում ունենանք Ադրբեջանի նախագահի հետ։ Դա լինելու է առանց օրակարգի հանդիպում, բայց կարևոր ուղենիշներից մեկը բանակցային ձևաչափի քննարկումն է լինելու»,- ասել է Փաշինյանը։
Փաշինյանի խոսքով՝ քանի դեռ բանակցային ձևաչափի վերաբերյալ համաձայնություն չկա, շփումներն ու քննարկումները պաշտոնական բանակցություններ համարվել չեն կարող։
«Ես չեմ խոսում Արցախի Հանրապետության անունից, որովհետև այն ունի իր իշխանությունը, իր նախագահը, իր կառավարությունը, և բանակցային գործընթացքում Արցախի անունից պետք է խոսի Արցախի իշխանությունը։ Սա շատ կարևոր է։ Մենք պետք է ամեն ինչ անենք, որպեսզի Ղարաբաղը բանակցային գործընթացքում սուբյեկտայնության նոր մակարդակ ունենա»,- ընդգծել է Փաշինյանը։
Անդրադառնալով Ղարաբաղյան հակամարտության կարգավորմանը, Փաշինյանը նշել է, որ հնարավոր փոխզիջումների մասին Հայաստանի կառավարությունը կխոսի միայն այն ժամանակ, երբ Ադրբեջանը հստակ պատասխան կտա։
«Իսկ ո՞վ է ասել, որ փոխզիջումների մասին առաջինը Հայաստանը պետք է խոսի։ Ադրբեջանն է, որ ամեն օր սպառնալիքներով է խոսում ղարաբաղյան հարցի կարգավորման մասին և մեր հասցեին։ Եթե որևէ մեկը մտածում է, որ կարող է սպառնալիքով կամ ուժով Ղարաբաղի հարց լուծել, չարաչար սխալվում է»,- ընգդծել է վարչապետը։
Նելլի Մելքոնյան
