11.10.2026 | 21:39
Երևան-Սևան ճանապարհին մեքենան գլորվել է 20 մետր խորությամբ ձորը
Պակիստանը գնդակոծել է Հնդկաստանի հյուսիսային բնակավայրերը
Քաղաքականություն
28.02.2019 | 12:48
Պակիստանն այսօր առավոտյան գնդակոծել է Հնդկաստանի հյուսիսային Ջամմու և Քաշմիր նահանգների բնակավայրերը: Հնդկական կողմը պատասխան կրակ է բացել: Այսպիսով, պակիստանյան կողմն արդեն յոթերորդ անգամ անընդմեջ խախտում է հրադադարի ռեժիմը, գրում է ՌԻԱ Նովոստին:
«Առավոտյան 6-ի սահմաններում Պակիստանը խախտել է հրադադարի ռեժիմը՝ կրակ բացելով Կրիշնա Գհաթի հատվածի երկայնքով»,- հաղորդում է India Today-ը՝ վկայակոչելով հնդկական զինված ուժերի ներկայացուցիչ, փոխգնդապետ Դևենդեր Անանդին:
Հնդկաստանի զինվորականները պատասխան կրակ են բացել, փոխհրաձգությունը շուրջ մեկ ժամ է տևել:
Նշենք, որ չորեքշաբթի պակիստանյան բանակը հայտարարել էր հնդկական երկու ռազմական օդանավ խոցելու մասին: Նյու Դելիի տվյալներով էլ՝ Հնդկաստանը մեկ ՄիԳ-21 է կորցրել, միաժամանակ պակիստանյան կործանիչ է խոցել:
Նյու Դելին և Իսլամաբանն ավանդաբար լարված հարաբերություններ ունեն: Կողմերի միջև քաղաքական, պատմական և տարածքային խնդիրներ կան, մասնավորապես՝ Քաշմիրի կարգավիճակի հետ կապված: Վիճելի այս տարածքում անջատականներ են գործում, որոնք հանդես են գալիս Քաշմիրի անկախության կամ շրջանի՝ Պակիստանին միավորման օգտին:
Իրավիճակն առավել լարվեց փետրվարի 14-ից հետո, երբ մահապարտն իրեն պայթեցրեց հնդկական ռազմական ոստիկանության շարասրան մոտ: Պատահարը 45 մարդու կյանք խլեց: Հարձակման պատասխանատվությունը ստանձնեց «Ջաիշ-է-Մուհամմադ» իսլամական խմբավորումը:
Ի պատասխան՝ հնդկական օդուժը կրակ բացեց Քաշմիրի պակիստանյան հատվածում գտնվող խմբավորման ճամբարի ուղղությամբ, արդյունքում բազմաթիվ զինյալներ մահացան:
Հնդկաստանի ԱԳՆ-ն հայտարարեց, որ դա «բացարձակ անհրաժեշտություն էր», քանի որ խմբավորումը նոր հարձակումներ էր նախապատրաստում:
