Նրանք ժամանակին գլուխները տաքուկ անկյուններում դրած էին. Հովհաննիսյանը՝ ԵՊՀ-ում ցույց անող դասախոսների մասին. ՏԵՍԱՆՅՈՒԹ

ԵՊՀ ռեկտոր Արամ Սիմոնյանի անձի հետ խնդիր չկա, խնդիր կա համալսարանի կրթության որակի հետ: Այս մասին ԱԺ-ում լրագրողների հետ զրույցում ասաց ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի փոխնախագահ Հովհաննես Հովհաննիսյանը:

Խոսելով համալսարանում տեղի ունեցող իրադարձությունների մասին՝ նա նշեց, որ դրանք ազդում են դասախոսների աշխատունակության, ինչպես նաև ուսանողների ուսումնառության վրա:

«Բոլոր բուհերում կան խնդիրներ՝ կապված կրթական որակի հետ: Բուհերի ղեկավարները պետք է մտահոգված լինեն կրթության որակի բարձրացման խնդրով»,- ասաց Հովհաննես Հովհաննիսյանը:

Հարցին՝ ԵՊՀ ռեկտորի փոփոխությունը կարո՞ղ է բերել կրթության որակի փոփոխության, խորհրդարանական հանձնաժողովի փոխնախագահը պատասխանեց. «Ռեկտորից շատ բան է կախված, բայց նաև կախված է թիմից: Կան ռեկտորներ, որոնք ոչ մի բան չեն անում իրենց բուհում և շարունակում են աշխատել մինչև պաշտոնավարման ավարտը»:

Մեր ճշտող հարցին՝ ովքե՞ր են այդ ռեկտորները, Հովհաննես Հովհաննիսյանը պատասխանեց, որ անուններ չի տալու: Դիտարկմանը, որ ԵՊՀ-ում տեղի ունեցող ցույցերին մասնակցում են նաև դասախոսներ, ովքեր հայտարարում են, որ ռեկտորին փոխելով՝ համալսարանում հարցը չի լուծվի, Հովհաննիսյանն արձագանքեց. «Այդ դասախոսները ժամանակին գլուխները տաքուկ անկյուններում դրած էին, երբ համալսարանում տեղի էին ունենում հալածանքներ դասախոսների և ուսանողների նկատմամբ, իսկ նրանք երբևէ չէին բարձրաձայնում այդ ամենի մասին»:

Մանրամասները՝ տեսանյութում:

Նարեկ Կիրակոսյան