«#ՏարոնջանՏանըՄարդԿա՞ #ՎանդալիզմիցԻնչԿա». Ֆեյսբուքյան օգտատերը  նոր «վանդալիզմության» լուսանկարներ է հրապարակել

Ֆեյսբուքյան օգտատեր Գոհար Աբաջյանը սոցիալական ցանցի իր էջում հատված ծառերի լուսանկարներ է հրապարկել, գրառում արել ու հեշթեգով դիմել Երևանի գործող քաղաքապետ Տարոն Մարգարյանին՝ #ՏարոնջանՏանըՄարդԿա՞ #ՎանդալիզմիցԻնչԿա:

««Արաբկիր կանաչապատում» -ը Արաբկիր թաղապետարանի հարևանությամբ 2 օրում ահա այսպես «կանաչապատեց» տարածքը` սրճարանի զոնտիկների համա՞ր»,- գրել է օգտատերը:
Նոր  «վանդալիզմության» վերաբերյալ առայժմ չի հաջողվում սատանալ պատկան կառույցների արձագանքը:

Հիշեցնենք, որ ապրիլին քաղաքացի Ալեքսան Սամսոնյանը Դավթաշեն վարչական շրջանում 23 ծառ էր հատել:

Իշխանություններն արագ արձագանքեցին կատարվածին, քրգործ հարուցեցին, Սամսոնյանին կալանավորեցին: «Ծառեր ես եմ կտրել, բայց չեմ ցանկացել ոչնչացնել, այլ ընդամենը խորը էտ եմ իրականացրել»,- խոստովանեց Սամսոնյանը:

Քաղաքապետ Տարոն Մարգարյանը նրա արարքը «վանդալիզմություն» որակեց:  Իսկ Սերժ Սարգսյանի անունից նախագահի խոսնակը փոխանցեց. «Այդ բարբարոսության հեղինակները կրելու են օրենքով սահմանված պատասխանատվություն»:   

Օրեր անց հատված ծառերը սկսեցին կանաչել, կալանավորված Ալեքսան Սամսոնյանն ազատ արձակվեց, սակայն նրա նկատմամբ քրեական հետապնդումը չդադարեցվեց:

Կատարվածի առնչությամբ Factor.am-ը զրուցել էր Հայաստանի Կանաչների միության նախագահ Հակոբ Սանասարյանի հետ, որը հարցրել էր. «Իսկ ին՞չ անուն տալ Նորքի բարձունքից մինչև Բաղրամյան պողոտայի վերին մասը ձգվող անտառպետության ոչնչացմանը: 23 ծառերի հատումը վանդալիզմ է, իսկ 23.000 –ի՞նը»: