16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Զինծառայողների սննդի ապահովման հարցում անում ենք հեղափոխական փոփոխություն․ վարչապետ. ՏԵՍԱՆՅՈՒԹ
Հասարակություն
21.02.2019 | 12:41
Կառավարության փետրվարի 21-ի նիստում գործադիրն ընդունեց որոշման նախագիծ, որով առաջարկվում է իրականացնել փորձնական ծրագիր՝ ՀՀ զինված ուժերին սննդի մատակարարումը մասնավոր գործընկերոջը հանձնելու նպատակով:
Նախագծի զեկուցող պաշտպանության նախարարի տեղակալ Մակար Ղարիբյանը՝ նշեց, որ փորձնական ծրագրով առաջարկվում է ճաշարանների, պահեստների ու ճաշարանային արտադրամասերի վերակառուցում կամ վերանորոգում, տեխնիկական միջոցների, կահույքի, խոհանոցային սպասքի և այլ անհրաժեշտ գույքային համալրում, սննդի գծաշարային բաշխում, ճաշատեսակների ընդլայնում և բազմազանության ապահովում, որոնց արդյունքում կստեղծվեն հավելյալ աշխատատեղեր։
Ըստ Ղարիբյանի՝ այս ծրագրի իրականացման համար անհրաժեշտ է առնվազն երեք ընկերության մասնակցություն, որոնցից երկուսն արդեն հայտնի են։ Վարչապետ Նիկոլ Փաշինյանը նախագծի վերաբերյալ նկատեց, որ այն շատ լավն է, և այն գործընկերները, որոնք պետք է ներգրավվեն, պետք է ունենան պարտավորություն կապիտալ նորոգման ենթարկել ճաշարանները, պաշտպանել աշխատատեղերը՝ նույն մարդկանց վերապատրաստելով։
«Այս փորձի միջոցով պետք է վեր հանենք բոլոր պարամետրերը, որոնք անհրաժեշտ են նման ծրագիրը մրցույթի դնելու համար: Հաջորդը՝ վերջին ամիսներին բախվել ենք այն խնդրին, որ շատ մրցույթներ, ըստ էության, փակուղու են բերել, քանի որ մի քանի ընկերություններ են մասնակցել, հաղթել է մի ընկերություն, այնուհետև պարտվող ընկերությունը հաղթողին դատի է տվել, և մատակարարման պրոցեսները դե յուրե կանգնեցվել են»,- ասաց վարչապետը՝ շեշտելով, որ պետք է բացառեն այս հարցում կոռուպցիոն ռիսկերը և կարողանան օր առաջ զինվորների սննդի որակի հարցը լուծել։
«Եթե հին մեխանիզմի փոխարեն նորը չես դնում, հինը հենց այդպես դիզայն արված է, որ այդպես պետք է աշխատի: Իհարկե, փոփոխություններ արվել են, բայց այդ փոփոխությունները շրջադարձային համարել չի կարելի: Այս հարցով նպատակ ունենք ապահովել շրջադարձային փոփոխություն, որպեսզի բոլորն ընդունեն, որ դա հեղափոխական փոփոխություն է զինվորներին սնունդ մատակարարելու առումով»,- ասաց նա:
Մանրամասները՝ տեսանյութում։
Աղավնի Սուքիասյան
