Ալիկ Սարգսյանի և Վլադիմիր Գասպարյանի վերաբերյալ քրեական գործերի նախաքննությունը դեռ չի ավարտվել․ ՀՔԾ

ՀՀ նախկին ոստիկանապետ  Ալիկ Սարգսյանի և Վլադիմիր Գասպարյանի վերաբերյալ երկու քրեական գործ է քննվում Հատուկ քննչական ծառայության վարույթում։

Factor.am-ի հետ զրույցում ծառայության մամուլի խոսնակ Մարինա Օհանջանյանն ասաց, որ նախկին ոստիկանապետերին վերաբերող երկու քրեական գործերի նախաքննությունը շարունակվում է։

«Գործերի նախաքննությունը շարունակվում է, նախաքննության շահերից ելնելով այլ մանրամասներ չեն կարող հաղորդել»,- ասաց Օհանջանյանը։

Նշենք, որ 2018 թվականի հուլիսի 18-ին ՀՀ քննչական կոմիտեի ՀԿԳ քննության գլխավոր վարչությունում հարուցվել էր քրեական գործ՝ առանձնապես խոշոր չափերով կաշառք ստանալու, տալու, կաշառքի միջնորդության և շորթման դեպքերի առթիվ։ Դեպքին, ըստ նախնական տվյալների, ներգրավված են եղել  ՀՀ ԱԺ նախկին պատգամավոր Ալիկ Սարգսյանը և ՀՀ Արարատի մարզի նախկին մարզպետը:

2018 թվականի դետեմբերի 18-ին Քննչական կոմիտեն հայտնեց, որ  հակամրցակցային գործունեություն ծավալելու դեպքի առթիվ ՀՀ քննչական կոմիտեի ՀԿԳ քննության գլխավոր վարչությունում քննվող քրեական գործով տվյալներ են ձեռք բերվել, որ ՀՀ ազգային ժողովի 2012թ.-ի ընտրություններից առաջ՝ հունվար-փետրվար ամիսներին, ՀՀ ոստիկանության նախկին պետը (Վլադիմիր Գասպարյանը խմբ․)  իր պաշտոնեական դիրքն ու լիազորությունները ծառայության շահերին հակառակ օգտագործելով, խոստացել է միջամտել և օգնել «Քինգ Դելյուքս» ընկերության նախկին սեփականատիրոջը՝ վճարովի ուղևորափոխադրումների հետ կապված խնդիրները լուծելու հարցում, եթե վերջինս ՀՀ ԱԺ ընտրություններում աջակցի Հայաստանի Հանրապետական կուսակցությանը: Դեպքի առթիվ հարուցվել էր քրգործ ՀՀ քրեական օրենսգրքի 308-րդ հոդվածի 2-րդ մասի հատկանիշներով։