Հասարակություն
19.02.2019 | 19:14
Երևանի ընդհանուր իրավասության դատարանի Ավան և Նոր Նորք վարչական շրջանների նստավայրում դատավոր Դավիթ Հարությունյանի նախագահությամբ կայացավ «Ֆլեշ» ՍՊԸ-ի նախագահ Բարսեղ Բեգլարյանի և «Ֆլեշ» ՍՊԸ-ի բազայի պետ Հրայր Հովսեփյանի գործով դատական նիստը:
Այսօրվա նիստին Բեգլարյանի պաշտպան Կրոմվել Գրիգորյանը բացարկի միջնորդություն ներկայացրեց մեղադրող Աբգար Առաքելյանին. միջնորդությունը բաղկացած էր 16 էջից: Թեև դատարանը փորձեց պաշտպանին համոզել՝ չընթերցել 16 էջում մեջբերված բոլոր օրենքներն ու հիմնավորումները, սակայն ջանքերն ապարդյուն անցան: Պաշտպանը պնդեց, որ դրանք դատախազին են պետք:
Միջնորդության մեջ պաշտպանը դատախազին մեղադրում էր պարտականությունները բավարար կերպով չկատարելու, գործի նյութերն իրենց չտրամադրելու, վկաներից երկուսի հետ առերեսում չիրականացնելու համար: Դատախազն առարկեց ներկայացված միջնորդության դեմ՝ ասելով, որ դրանցում փաստերը ճիշտ չեն ներկայացված, և որ միջնորդությունն օրենքի պարզ շարադրանք է հիշեցնում:
Դատարանը խորհրդակցական սենյակից վերադառնալով՝ հայտարարեց, որ մերժում է Բեգլարյանի պաշտպանի միջնորդությունը: Պաշտպանն էլ միջնորդեց, որպեսզի նախաքննության ընթացքում իր պաշտպանյալների նկատմամբ ընտրված խափանման միջոցը՝ ստորագրություն չհեռանալու մասին, վերացվի և նոր խափանման միջոց չընտրվի՝ հաշվի առնելով նաև այն, որ համաներման կիրառման արդյունքում խափանման միջոցի կիրառումը չեղարկվում է: Դատախազն այս միջնորդության դեմ առարկեց:
Դատարանը հեռացավ խորհրդակցական սենյակ՝ որոշում կայացնելու, որը կհրապարակի վաղը՝ փետրվարի 20-ին:
Հիշեցնենք, որ Բարսեղ Բեգլարյանին մեղադրանք է առաջադրվել այն բանի համար, որ նա 2016 թվականի մարտ-ապրիլի ընթացքում Արման Մայիսի Մկրտումյանի նկատմամբ բռնություն գործադրելով, ինչպես նաև կյանքի և առողջության համար վտանգավոր բռնություն գործադրելու սպառնալիքներով կատարել է ինքնիրավչություն՝ վերջինի օրինական շահերին պատճառելով էական վնաս: Փաստական տվյալների համաձայն՝ Ն.Բեգլարյանին պատկանող «Ֆլեշ Մոտորս» ՍՊ ընկերությունից 2015 թ. ընթացքում իրականացվել է առանձնապես խոշոր չափերի գույքի հափշտակություն, որի կատարման մեջ ընկերության սեփականատերն ու հարազատները մեղադրել են «Ֆլեշ Մոտորս» ՍՊ ընկերության նախկին կոմերցիոն տնօրենին և պահանջել վերականգնել ենթադրաբար պատճառված գույքային վնասը։
Լիլիթ Շաբոյան
