Գուրգեն Մարգարյանի սպանությունը պետական պատվեր է եղել․ փաստաբան․ ՏԵՍԱՆՅՈՒԹ

Այսօր՝ փետրվարի 19-ին, լրանում է Բուդապեշտում ադրբեջանցի սպա Ռամիլ Սաֆարովի կողմից կացնահարված հայ սպա Գուրգեն Մարգարյանի սպանության 15-րդ տարին։ Գուրգեն Մարգարյանի իրավահաջորդների շահերը ներկայացնող փաստաբան Նազելի Վարդանյանն այսօր հրավիրված մամուլի ասուլիսի ժամանակ, անդրադառնալով դեպքին, նշեց, որ  այստեղ գործ ունենք պետական պատվերի հետ։

«Ես միշտ ասում էի, որ Սաֆարովն ինքն իրեն այդ հանցագործությունը չէր անի, այստեղ պետական պատվեր կա, որովհետև, երբ  ուսումնասիրում ես Սաֆարովի կենսագրությունը, ինքը բավականին հեռանկարային սպա է եղել։ Եթե Սաֆարովը համոզված չլիներ, որ Ադրբեջանն իր մեջքին կանգնած է, նա նման քայլի չէր գնա։ Մենք պետք է միշտ բարձրաձայնեք այս հարցը, որպեսզի ադրբեջանական կողմը զգա իր մեղավորությունն այս գործում»,- ասաց պաշտպանը։

Վերջինիս խոսքով՝ Սաֆարովի դատավարությունն անցկացվել է Հունգարիայում։ Բժշկական փորձաքննությունը նրան մեղսունակ է ճանաչել. դատարանը Սաֆարովին դատապարտել է ցմահ բանտարկության՝ առաջին 30 տարում առանց համաներման իրավունքի, սակայն 2012-ին Սաֆարովը հանձնվել է Ադրբեջանին՝ հետագա պատիժն այնտեղ կրելու համար, և նույն օրն էլ նա ներում է ստացել Իլհամ Ալիևի կողմից։

«Բացի դա, Սաֆարովն արժանացել է ազգային հերոսի կոչման, բնակարան նվեր ստացել և դարձել մայոր՝ անազատության մեջ անցկացված ութ տարվա աշխատավարձի վճարումով»,- ասաց պաշտպանը՝ ընդգծելով, որ  Հունգարիայի կողմից Ռամիլ Սաֆարովին Ադրբեջանին հանձնելու որոշումը միջազգային նորմերի խախտմամբ իրականացված գործընթաց է եղել։

«Զարմանալի է՝ ինչպես է հունգարական կողմը նրան արտահանձնել, երբ բոլոր ցուցմունքների և հայտարարությունների ընթացքում Սաֆարովն ասել է, որ ինքը հատուկ սպա է դարձել, որ բոլոր հայերին ոչնչացնի, ինքը 100 տարի նստելուց հետո էլ դուրս է գալու, որ հայ սպանի։ Պարզ էր, որ ողջ դատավարության ընթացքում և դրանից հետո Սաֆարովը հերոսացվել է Ադրբեջանում»,- ասաց Նազելի Վարդանյանը։

Մանրամասները՝ տեսանյութում։

Աղավնի Սուքիասյան