Թևերներս կապելո՞ւ էին, ծեծելո՞ւ էին, որ ասում են՝ ընդդիմությունը կարողացավ դեմ քվեարկել. Էդմոն Մարուքյան. ՏԵՍԱՆՅՈՒԹ

ԼՀԿ խմբակցության ղեկավար Էդմոն Մարուքյանը փետրվարի 18-ին ԱԺ ճեպազրույցների ժամանակ ամփոփեց խորհրդարանի նախորդ նստաշրջանը՝ նշելով, որ Ազգային ժողովում Կառավարության ծրագրի քննարկումն անակնկալ էր իրենց համար:

«Մենք չէինք սպասում, որ ընդդիմադիր խոսքը կարող է վերածվել տրոլինգի, ձեռք առնելու, մուննաթի, նաև, որոշ դեպքերում, սպառնալիքի»,- ասաց նա:

Մարուքյանը նշեց, որ նիստից հետո կրկին կուսակցությունն ատելության խոսքի հարձակման, ինչպես նաև որոշակի մեդիա մոնիպուլյացիաների, կեղծ լուրերի տարածման տակ է: «Այստեղ իշխանական լրատվամիջոցները մեծ դեր ունեն, որի մասին կուսակցությունը հայտարարություն տարածեց՝ որոշակի հանգամանքներ հերքելու ու դատապարտելու առումով: Որևէ բան մեզ չի կանգնեցրել և չի կանգնեցնելու հիմա: Մենք զուսպ, հանգիստ, հետևողական, հավատարիմ մնալով մեր սկզբունքներին՝ շարունակելու ենք աշխատել»,- հավելեց նա:

Հարցին, թե ի՞նչ սպառնալիքի մասին է խոսքը, Մարուքյանը նշեց, որ նկատի ունի և՛ ֆեյսբուքյան տարբեր գրառումները, և՛ իրենց ուղղված որոշ խոսքեր:

«Գնահատականը տվել եմ, և իրենք գիտեն որն է: Իրենք չպետք է մեզ ասեն, թե ինչ ասենք, ինչ չասենք»,- հայտարարեց Էդմոն Մարուքյանը: Նա բնական է համարում իշխանությունների պնդումները, թե որևէ ճնշում չի եղել, ընդամենը քաղաքական բանավեճ է եղել:

Ինչ վերաբերում է «Իմ քայլը» խմբակցության պատգամավոր Լենա Նազարյանի դիտարկմանը, թե ընդդիմությունը հնարավորություն է ունեցել հանգիստ հարցեր տալ և, թերևս, առաջին անգամ էր, որ քվեարկության հարցում անկաշկանդ էին, ԼՀԿ ղեկավարը զարմացավ. «Նախկինում չենք կարողացե՞լ հարցեր տալ: Ինչ է՝ եկել են, ծեծե՞լ են, երբ ուզել է հարցեր տալ: Եթե դա պրոգրես է, ապշած եմ: Որ ասում են՝ ընդդիմությունը կարողացավ ազատորեն դեմ քվեարկել, ի՞նչ պետք է անեին՝ թևերներս կապելո՞ւ էին»:

Մանրամասները՝ տեսանյութում:

Նարեկ Կիրակոսյան