11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
Տիգրան Խաչատրյանը հանդիպել է ԵՄ ԱլԳ հարցերով հատուկ դեսպաններին
Տնտեսություն
14.02.2019 | 15:58
ՀՀ տնտեսական զարգացման և ներդրումների նախարարությունից տեղեկացնում են, որ նախարար Տիգրան Խաչատրյանը հանդիպել է Եվրոպական միության անդամ երկրների` Արևելյան գործընկերության հարցերով հատուկ դեսպաններին:
Նախարարը կարևորել է հանդիպումը եվրոպացի գործընկերների հետ տեղեկատվության փոխանակման տեսանկյունից։ Տիգրան Խաչատրյանը ներկայացրել է Հայաստանի կառավարության ծրագրի հիմնական տնտեսական առաջնահերթությունները և գործադիրի մոտեցումներն այնպիսի ուղղություններում, ինչպիսիք են հավասար մրցակցային պայմանները, ազատ մուտքը դեպի շուկաներ, տնտեսական մրցունակությունը, արտադրողականությունը և այլն։
Պատասխանելով դեսպանների հարցերին՝ նախարարը նշել է, որ ներառական տնտեսական աճը կառավարության և կառավարության ծրագրի ամենակարևոր սկզբունքներից մեկն է։ Պատասխանելով տնտեսական աճի ցուցանիշի վերաբերյալ հարցին՝ նախարարն ընդգծել է, որ էական է տնտեսական աճի որակը և հավելել, որ Հայաստանի տնտեսական կյանքում տեղի ունեցող փոփոխությունները և բարեփոխումները պետք է ազդեն նաև տնտեսական աճի կառուցվածքի վրա։
Նախարարը պատասխանել է դեսպանների մի շարք այլ հարցերի, որոնք առչնվում էին գործարար միջավայրին, ՓՄՁ զարգացմանը, արտաքին առևտրի կառուցվածքին, կանաչ տնտեսությանը և այլն։ Անդրադառնալով գորածարար միջավայրին և համապատասխան կարգավորումներին՝ նախարարը ներկայացրել է Հայաստանի վերաբերյալ եզրակացությունները գործարարությամբ զբաղվելու զեկույցեներում և նշել, որ անհրաժեշտ է վերացնել այն բոլոր կարգավորումները, որոնք էական ազդեցություն չունեն հասարակական կյանքի վրա, սակայն բիզնեսի համար բեռ են և էապես նվազեցնել այլ կարգավորումների ֆինանական և ժամանակային բեռը։ Տնտեսական զարգացման և ներդրումների նախարարը կարևորել է նաև կառավարության կողմից ձեռնարկվող փոփոխությունների ազդեցության արագության մեծացումը տնտեսական կյանքի վրա։
Տիգրան Խաչատրյանը պատասխանել է նաև Հայաստանի տնտեսության՝ զարգանալու մեծ ներուժ ունեցող ճյուղերի վերաբերյալ հարցին, ներկայացրել չօգտագործված հնարավորություններն իրացնելու և արտադրողականությունը բարձրացնելու հեռանկարները։
Ավստրիայի Հանրապետության Եվրոպայի, ինտեգրման և արտաքին գործերի դաշնային նախարարության Արևելյան գործընկերության հարցերով հատուկ բանագնաց Թոմաս Բուխսբաումը պատվիրակության անունից շնորհակալություն է հայտնել Տիգրան Խաչատրյանին հանդիպման համար և նշել, որ բարձր են գնահատում պրոֆեսիոնալ կարծիքը և համապարփակ տեղեկատվության տրամադրումը։
