Վարդան Ղուկասյանն առաջարկում է ոչ թե Մեղրին, այլ Գյումրին ու Սպիտակը դարձնել ազատ տնտեսական գոտի. ՏԵՍԱՆՅՈՒԹ

Ազգային ժողովի պատգամավոր Վարդան Ղուկասյանը պնդում է՝ ոչ թե Մեղրին, այլ Գյումրին և Սպիտակը պետք է դարձնել ազատ տնտեսական գոտի:

«Երբ իմացանք, որ Մեղրին դարձել է ազատ տնտեսական գոտի շատ հայորդիներ վրդովվեցին: Շատ տնտեսագետներ ասում են դարձրել ենք ազատ տնտեսական գոտի, որ Իրանից ներդրումներ արվեն, մատչելի է, սահմանային գոտի է, բայց շատ ռիսկային հատված են ընդգրկել: Մենք գիտենք, որ ազատ տնտեսական գոտի ստեղծում են ոչ թե ներկրելու, այլ աշխատատեղեր ստեղծելու համար: 1996 թվականից ես ասում եմ, որ Գյումրին պետք է դարձնել ազատ տնտեսական գոտի: Երեսուն տարի է անցել երկրաշարժից, իսկ ներդրումները Գյումրիում, հավանական է, 0,1 % են: Եթե մենք կարծում ենք, թե պիտի այնպիսի դաշտ ստեղծենք, որ դրսի ներդրողները գումարները ձեռքներին խելագարված գան այստեղ ներդրումներ անեն, ցավոք սրտի, սխալվում ենք: Կարծում եմ՝ շատերն են այդպես կարծում»,- այսօր խորհրդարանում իր ելույթում ասաց պատգամավորը։

Վերջինս նշեց, որ մշտապես բարձրաձայնել է՝ մարդկանց տնակներից հանելու և նոր բնակարաններ կառուցելու անհրաժեշտությունը։ «Լավ, բնակարաններ ենք կառուցում, բայց ինչո՞ւ ենք փոշիացնում այդ գումարները: Հիմա կասեք մեկ ասում եք բնակարան կառուցեք, մեկ էլ ասում եք՝ փոշիացնում եք: Կոնկրետ մարդիկ, որ բնակարան են ստանում իրենց ապրուստը հայթայթելու համար մեկնում են Երևան կամ արտասահման: Լույսերը մարած են քաղաքի: Անիի ավերակներն է դարձնում կամաց- կամաց: Ուրիշ ինչ ձևով ներկայացնեմ, որ վատ է քաղաքի վիճակը»,- ասաց պատգամավորը։

Մանրամասները՝ տեսանյութում։

Աղավնի Սուքիասյան