Գյուղերում շատ դեպքերում բացակայում է նախաձեռնողական ոգին. ՀՀ 4 մարզում էկոտուրիզմի զարգացմանն ուղղված միջոցառումներ են իրականացվել

«Եվրոպական քաղաքացիության և ինքնության ցանց» հասարակական կազմակերպության հայաստանյան մասնաճյուղը և «Գաստրոէնտերոլոգների հայկական ասոցիացիա» հասարակական կազմակերպությունը հանրապետության չորս մարզում՝ Տավուշ, Գեղարքունիք, Արարատ, Վայոց ձոր, իրականացրել են մի շարք միջոցառումներ՝ ուղղված էկոտուրիզմի զարգացմանը։

Ինչպես տեղեկացրին Հայաստանի երիտասարդական հիմնադրամի հասարակայնության հետ կապերի ծառայությունից, Խաշթառակ, Կարճաղբյուր, Ուրցաձոր, Աղավնաձոր համայնքների մի խումբ ընտանիքների համար անցկացվել են ագրոտուրիզմի վերաբերյալ դասընթացներ։ Ծրագրի կազմակերպիչները նկատում են, որ գյուղերում շատ դեպքերում բացակայում է նախաձեռնողական ոգին, գյուղական բնակչությունն այսօր ունի շուկայական հարաբերությունների ոլորտ ներգրավվելու խնդիր, և իրենց ծրագրով փորձել են լուծել նաև այդ հարցերը։

«Եվրոպական քաղաքացիության և ինքնության ցանց» հասարակական կազմակերպության հայաստանյան մասնաճյուղի տնօրեն Եվա Հակոբյանը նշում է, որ սեմինարների միջոցով մասնակիցներին փոխանցվել են գիտելիքներ էկոտուրիզմի արդյունավետության, այդ բնագավառում աշխարհի այլ երկրների գյուղացիների փորձի մասին։ Օգնել են ստեղծել գործարար կապեր գյուղացիների և տուրիստական ընկերությունների միջև հետագա համագործակցության նպատակով։

Յուրաքանչյուր գյուղից մեկ ընտանիքի նվիրել են թոնիր, ինչը տվյալ համայնքներում կհաղորդի հայկական կոլորիտ, բացի այդ, կկրճատի աղքատությունը գյուղական համայնքներում, քանի որ գործարկելով թոնիրը՝ կկարողանան եկամուտ ստանալ։ Ծրագրի շրջանակներում ընդգրկված ընտանիքներին հատկացվել են նաև ազնվամորու տնկիներ։

Ըստ Եվա Հակոբյանի՝ իրենց կողմից խրախուսվել է, որպեսզի ծրագրի շրջանակներում ներգրավված անձինք աշխատեն թիմերով։ Ընդ որում, նշված գյուղերում արդեն առկա են արդյունքները։ Ծրագրի մասնակիցներն արդեն իսկ գիշերակացով հյուրընկալում են զբոսաշրջիկների՝ նրանց համար ապահովելով առավել մատչելի, առանձնահատուկ հանգիստ, որն իր մեջ ներառում է ծանոթություն հայկական կոլորիտին, պատմամշակութային օջախներին, ավանդույթներին և սովորույթներին։

Գաստրոէնտերոլոգների հայկական ասոցիացիան հավաքագրել է տեղեկություններ Խաշթառակ, Կարճաղբյուր, Ուրցաձոր, Աղավնաձոր համայնքների խոհանոցի, ավանդույթների և այլնի մասին, որոնք կամփոփվեն տպագրվելիք քարտեզ-գրքույկում։ Դրանք էլ տուրիստական կազմակերպությունների միջոցով կտրամադրվեն զբոսաշրջիկներին, կկազմակերպվեն տուրեր՝ այս գրքույկում տեղ գտած ուտելիքները տեղի բնակչության միջոցով տուրիստներին մատուցելու համար։

Տեղեկացնենք, որ նշված ծրագիրն իրականացվել է ՀՀ Նախագահի աշխատակազմի կողմից հատկացված դրամաշնորհի և Հայաստանի երիտասարդական հիմնադրամի հայտարարած մրցույթի շրջանակներում։