19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ի՞նչ զիջումներից է խոսել Սերժ Սարգսյանն արցախցիների հետ 2017 թվականին. Արցախից արձագանքում են
06.02.2019 | 17:15
«Ղարաբաղցիներին հարցրեք՝ 2017 թվականին Սերժ Սարգսյանը ձեզ հետ ինչի՞ մասինն է բանակցել, ի՞նչ զիջումներ պետք է անեիք, ո՞նց պետք է անեիք: Ղարաբաղի ղեկավարությանն այդ հարցերն ուղղեք, հիմա որ բլբլում են, ասա էն ժամանակ բլբլայիք, որ եկել էր ձեզ հետ խոսելու ու ասելու, թե ինչ է լինելու»,- այս մասին երեկ Ազատություն ռ/կ-ի հետ զրույցում հայտարարեց Արցախի պաշտպանության բանակի նախկին հրամանատար, Արցախի հերոս Սամվել Բաբայանը՝ հավելելով, որ այն ժամանակ ՀՀ երրորդ նախագահը մեծ դահլիճում հանդիպման է հրավիրել ոչ միայն Արցախի իշխանությանը, այլ ակտիվիստների և այլոց: Հանդիպման ընթացքում, ըստ Բաբայանի, խոսվել է Արցախի խնդրի շուրջ հնարավոր զիջումներից: Բաբայանը հորդորեց այդ մասին մանրամասներ ճշտել Ռազմիկ Պետրոսյանից և Արմո Ծատրյանից:
Factor.am-ը այս հայտարարության առնչությամբ փորձեց մանրամասներ ճշտել Արցախի նախագահի մամուլի խոսնակ Դավիթ Բաբայանից:
-Պարո՛ն Բաբայան, Սամվել Բաբայանի՝ երեկ արած հայտարարությանը ենթադրում եմ՝ ծանոթ եք, ի՞նչ զիջումների մասինն է խոսել Սերժ Սարգսյանն այդ հանդիպմանը, կմանրամասնե՞ք:
-Գիտեք՝ ինքն հայտարարել է, որ հանդիպում է եղել և քննարկվել են կարգավորմանն ուղղված հարցեր, նաև մատնանշել է այն մարդկանց, ումից պետք է ճշտեք: Որքան ես եմ տեղյակ, իմ անունն ինքը չի շոշափել:
-Դուք այդ հանդիպմանը ներկա եք եղել, ճի՞շտ եմ:
-Ես ասեմ հետևյալը՝ տարբեր հանդիպումներ են եղել, բայց Արցախի տեսակետը մեկն է՝ անցյալին հետդարձ չկա` լինի կագավիճակի, լինի սահմանների առումով:
-Ի՞նչ է առաջարկել Սերժ Սարգսյանը:
-Սամվել Բաբայանն ասել է չէ՞ ում դիմեք, իսկ դուք ինձ եք դիմում: Ավելի ճիշտ չէ՞ դիմեք սկզբնաղբյուրին:
-Դուք չե՞ք ուզում խոսել այդ հանդիպման մասին:
-Ես ասեմ՝ մեր տեսլականը հետևյալն է՝ Արցախը երբևիցե չի լինելու Ադրբեջանի կազմում, որ սահմանների հարցը մեզ համար անվտանգության և մեր գոյատևման խնդիրն է: Միշտ էլ այդ մասին խոսել ենք, երբևէ պարտադրանք որևէ մեկի կողմից չի եղել:
-Եթե Սերժ Սարգսյանի կողմից ևս պարտադրանք չի եղել, ապա ինքն ի՞նչ է առաջարկել զիջել:
-Ավելացնելու բան չունեմ, թողեք տեսնենք, գուցե այդ մարդիկ են խոսում, հետո բան կանենք էլի…
-Այսինքն դուք սպասում եք՝ իրենք խոսեն, հետո՞ դուք:
-Վերջ էլ չենք խոսում, հաջողություն:
Շողիկ Գալստյան
