12.10.2026 | 13:08
ԱՄՆ-ը սպառնում է արգելափակել Ուկրաինային զենքի մատակարարումը՝ ռուսական նավթավերամշակման գործարաններին հարվածների պատճառով․ FT
«Էներգաիմպեքս» ՓԲԸ-ի բաժնետոմսերի կառավարման լիազորություններն անցան Էներգետիկ ենթակառուցվածքների և բնական պաշարների նախարարությանը
Տնտեսություն
06.02.2019 | 12:15
«Էներգաիմպեքս» ՓԲԸ-ի պետական սեփականություն հանդիսացող բաժնետոմսերի կառավարման լիազորությունները վերապահվեցին ՀՀ Էներգետիկ ենթակառուցվածքների և բնական պաշարների նախարարությանը:
Կառավարության ընդունած որոշման համաձայն՝ ՀՀ Էներգետիկ ենթակառուցվածքների և բնական պաշարների նախարարության առաջարկությամբ «Էներգաիմպեքս» ՓԲԸ-ն ընդգրկվել էր «Պետական գույքի մասնավորեցման 2017-2020 թվականների ծրագրի մասին» օրենքի ցանկում:
2018 թվականի հուլիսի 1-ից ուժի մեջ մտած «Էներգետիկայի մասին» օրենքում կատարված փոփոխությունների համաձայն՝ էլետրական էներգիայի ներկրման և արտահանման գործունեությունն իրականացվելու է առանց էլեկտրական էներգիայի ներկրման և արտահանման լիցենզիայի, և էլեկտրաէներգետիկական մեծածախ շուկայի մասնակիցները ներկրումը և արտահանումն իրականացնելու են իրենց լիցենզիաների շրջանակում։
Սակայն օրենսդրական փոփոխությունների արդյունքում էլեկտրական էներգիայի բաշխման (ՀԷՑ ՓԲԸ) և փոխադրման (ԲԷՑ ՓԲԸ) լիցենզիա ունեցող անձինք զրկվել են ներկրում կամ արտահանում իրականացնելու իրավունքից և հանդես են գալու բացառապես որպես շուկային ծառայություններ մատուցող սուբյեկտներ, իսկ էլեկտրական էներգիայի արտադրության լիցենզիա ունեցող անձինք կարող են միայն արտահանել սեփական արտադրության էլեկտրական էներգիան։
Փաստացի ստեղծվել է մի իրավիճակ, երբ ներկայում էլեկտրական էներգիայի ներկրում կամ արտահանում իրականացնող անձինք այլևս իրավունք չեն ունենալու իրենց լիցենզիաների շրջանաում իրականացնել այդ գործառույթները։
Ուստի էլեկտրաէներգիայի արտահանման և ներկրման իրականացումն ապահովելու նպատակով՝ ՀՀ էներգետիկ ենթակառուցվածքների և բնական պաշարների նախարարությունը նպատակահարմար է գտնում իր ենթակայությամբ ունենալ այդպիսի ձեռնարկություն, որն իրավունք ունի էլեկտրաէներգետիկական մեծածախ շուկայում չկարգավորվող գներով էլեկտրաէներգետիկական մեծածախ շուկայի մասնակիցներից և ինքնավար էներգաարտադրողներից էլեկտրական էներգիա գնելու, ներկրելու, մեծածախ շուկայում վաճառելու և արտահանելու, որպիսին է էլեկտրական էներգիայի մեծածախ առևտրի լիցենզիա ունեցող «Էներգաիմպեքս»-ը:
