10.12.2025 | 17:42
200 հզ դոլարանոց տունը ի՞նչ է, որ 10-20 տարի հետո չունենամ. Սրբուհի Գալյան․ ՏԵՍԱՆՅՈՒԹ
Չլինելով իմ ելույթի թիրախում՝ Անդրանիկ Մանուկյանն ինքն իրեն թիրախավորեց և առաջիկայում անհարմար վիճակի մեջ է հայտնվելու դատարանում․ Արման Բաբաջանյան
Հասարակություն
05.02.2019 | 19:51
Ուկրաինայում ՀՀ նախկին դեսպան Անդրանիկ Մանուկյանը դատական հայց է ներկայացրել ԱԺ «Լուսավոր Հայաստան» խմբակցության պատգամավոր Արման Բաբաջանյանի դեմ՝ պահանջելով հրապարակային ներողություն խնդրել իրենից, հերքում տարածել ԱԺ-ում հավատարմագրված բոլոր լրատվամիջոցների միջոցով, ինչպես նաև հնչեցրած վիրավորանքի ու զրպարտությունների համար գանձել 7 դրամ՝ որպես ոչ նյութական վնասի փոխհատուցում։
Factor.am-ին այս մասին հայտնեց Անդրանիկ Մանուկյանի պաշտպան Ալեքսանդր Սիրունյանը՝ հավելելով, որ դատական հայցը ներկայացվել է փետրվարի 4-ին Երևանի ընդհանուր իրավասության դատարան։
Պատգամավորը Արման Բաբաջանյանը, սակայն, այս հայցը լավ առիթ է համարում՝ «դատարանում Անդրանիկ Մանուկյանի սխրագործությունների մասին ավելի հանգամանալից տեղեկություններ ներկայացնելու համար»։
Նա նշում է, որ դրանով առիթ կընձեռվի ավելի խորքային տեղեկություններ ստանալ Հոկտեմբերի 27-ին հաջորդած ժամանակահատվածում Անդրանիկ Մանուկյանի ունեցած դերակատարության, ինչպես նաև Ռոբերտ Քոչարյան-Անդրանիկ Մանուկյան հարաբերությունների մասին։
«Ինձ այս օրերին որոշ քաղաքացիներ զանգահարել և խնդրել են, որպեսզի իրենք ևս հնարավորություն ունենան Անդրանիկ Մանուկյանի վերաբերյալ դատարանում տեղեկություններ ներկայացնել։ Ես, հավանաբար, նրանց կհանդիպեմ և կհրավիրեմ, որպեսզի ի հավելումն իմ ունեցած տեղեկությունների՝ ինձ ձեռք մեկնած քաղաքացիներին հնարավորություն տամ Անդրանիկ Մանուկյանի գործունեության վերաբերյալ հետաքրքիր փաստեր ներկայացնել դատարանում»,- ասաց ԼՀԿ խմբակցության պատգամավորը։
Անդրադառնալով 7 դրամի փոխհատուցման պահանջին՝ Արման Բաբաջանյանը նկատեց, որ չի ցանկանում դրա վրա կենտրոնանալ, քանի որ իրեն ավելի շատ հուզում է մեկ այլ հանգամանք։
«Ամենևին չլինելով իմ ելույթի թիրախում՝ Անդրանիկ Մանուկյանն ինքն իրեն թիրախավորեց և առաջիկայում իրեն անհարմար վիճակի մեջ է դնելու դատարանում: Ես հունվարի 16-ի իմ ելույթում, ցույց տալով Անդրանիկ Մանուկյանի օրինակը, ուղղակի զգուշացնում էի, թե ինչպիսի գործառույթներ պետք է ստանձնի ԱԺ-ն առաջիկայում, որպեսզի դեսպանները հաշվետվություն ներկայացնեն, թե ինչով են զբաղված»,- ասաց Բաբաջանյանը։
Պատգամավորը տեղեկացրեց, որ վերջին օրերին դիմել է ԱԳՆ՝ խնդրելով տրամադրել դեսպանների վերջին 6 ամիսների աշխատանքային գրաֆիկը:
«Հարկատուների հաշվին տարբեր երկրներ գործուղված դեսպանները պետք է ամբողջ օրն աշխատեն, որպեսզի ՀՀ-ի շահն առաջ մղեն: Ես փորձում եմ հասկանալ, թե ինչո՞վ են զբաղված իրենց աշխատանքային օրվա ընթացքում»,- նշեց Արման Բաբաջանյանը՝ շարունակելով պնդել, որ Անդրանիկ Մանուկյանի օրինակն Ազգային ժողովում վկայաբերելով՝ ընդամենը ցույց է տվել, թե ինչպիսին չպետք է լինի դեսպանը:
«Ռոբերտ Քոչարյանի իշխանության ժամանակահատվածում օլիգարխիկ նկրտումներ ունեցած և իշխանության մաս կազմած Անդրանիկ Մանուկյանը, ստանձնելով Ուկրաինայում ՀՀ դեսպանի պաշտոնը, դեսպանի պարտականությունները կատարելու փոխարեն՝ զբաղվել է ձեռնարկատիրությամբ և ձեռքի հետ սպասարկել նաև Ռուսաստանի շահերը։ Ուստի, կարծում եմ, լավ հնարավարություն է՝ վերստին դատարանում այս մասին խոսելու և շատ կարևոր ապացույցներ բերելու, օրինակ՝ նրա հնդկահավերի ֆերմայի մասին, որի սեփականատերը Մանուկյանի որդին է՝ Դավիթ Մանուկյանը, ով ի դեպ, ներկայացրած հայտարարագրում չի նշել, որ Ուկրաինայում այդպիսի սեփականություն ունի»,- ասաց Արման Բաբաջանյանը։
Հիշեցնենք, որ հունվարի 16-ին պատգամավոր Արման Բաբաջանյանն Ազգային ժողովում նշել էր, որ Անդրանիկ Մանուկյանը սպասարկել է ռուսական շահերը, համագործակցել քրեական տարրերի հետ, նրա օրոք հայ-ուկրաինական հարաբերությունները վատթարացել են:
Աղավնի Սուքիասյան
