10.10.2026 | 13:33
NYMEX. Թանկարժեք մետաղների գներն աճել են
Վերին Լարսին այլընտրանք՝ նոր տրանսպորտային միջանցք. Մոսկվան ու Թբիլիսին ավարտել են 2011թ. համաձայնագրի կիրարկման համար անհրաժեշտ գործընթացը
Տնտեսություն
04.02.2019 | 16:52
Մոսկվան և Թբիլիսին ավարտին են հասցրել 2011 թվականի «Մաքսային վարչարարության և առևտրի մոնիթորինգի մեխանիզմի հիմնական սկզբունքների մասին» համաձայնագրի կիրարկման համար անհրաժեշտ գործընթացը: Այն թույլ կտա առևտրի և ապրանքների տարանցման համար օգտագործել Աբխազիայի և Հարավային Օսիայի տարածքները: Այս մասին գրում է «Կոմերսանտը»:
Սակայն դա, աղբյուրի փոխանցմամբ, չի երաշխավորում, որ Ռուսաստանի կողմից անկախ ճանաչված, իսկ Վրաստանի կողմից գրավյալ համարվող հանրապետությունների տարածքով իսկապես բեռներ կանցնեն դեպի Ռուսաստան և հակառակ ուղղությամբ:
Պայմանավորվածությունների նախագծի համաձայն՝ ծրագրվում է Աբխազիայի և Հարավային Օսիայի տարածքով անցնող նոր հսկիչ անցակետեր բացել, որտեղ մաքսային վերահսկողությունը կիրականացնի շվեյցարական SGS ընկերությունը:
«Բավական երկար ժամանակ պահանջվեց: Դա բացատրվում է այն հանգամանքով, որ նախագիծը բավական արտասովոր է: Որևէ տեղ նման նախադեպ չկա, ամեն ինչ առաջին անգամ է իրականացվելու»,- ասել է բանակցություններում Վրաստանի վարչապետի հատուկ ներկայացուցիչ Զուրաբ Աբաշիձեն:
Նա նաև նշել է, որ համաձայնագիրը կողմերին չի պարտավորեցնում մեխանիկորեն բացել միջանցքները:
ՌԴ փոխարտգործնախարար Գրիգորի Կարասինն իր հերթին հայտարարել է, որ հիմա կողմերը պետք է համաձայնագրի իրագործման մեխանիզմներ մշակեն, ինչի համար բավական շատ ժամանակ կպահանջվի: «Արագ առաջընթաց մի ակնկալեք»,- ասել է Կարասինը:
Նշենք, որ համաձայնագրի իրականացումը շահեկան կլինի նաև Հայաստանի համար. ակնկալվում է, որ այն այլընտրանք կդառնա Վերին Լարսի անցակետին, որը ձմռանը առաջ տեղումների և ձնահոսքերի պատճառով հաճախ արգելափակվում է:
