14.12.2025 | 11:03
Փաշինյանը պատարագի է մասնակցում Այգեշատի Սուրբ Գևորգ եկեղեցում․ ՈՒՂԻՂ
Փոխի՛ր աշխարհը փոքր գործերով. Թոմ Քաթինան ԱՄՆ-ում՝ Հայաստանի դեսպանատանը. VOA
Հասարակություն
03.02.2019 | 11:31
Եթե ցանկանում ես փոխել աշխարհը, սկսիր փոքր քայլերից. Վաշինգտոնում Հայաստանի դեսպանատանն անցած հանդիպման ընթացքում հավաքվածներին իր մոտեցումն էր ներկայացնում «Ավրորա» մրցանակի դափնեկիր, իսկ այժմ նաև՝ «Ավրորա» մարդասիրական նախաձեռնության նախագահ, ամերիկացի բժիշկ Թոմ Քաթինան. գրում է amerikayidzayn.com-ը:
«Յուրաքանչյուրը կարող է սեփական ներդրումն ունենալ: Պետք չէ հսկայական գործեր անել, փոխարենն արեք փոքր գործեր՝ մեծ սիրով: Շատերն ուզում են վիթխարի գործեր անել, արմատական փոփոխություն մտցնել: Դա այն չէ, ինչի կարիքը մենք ունենք»,- ասել է նա:
Աֆրիկայի հիվանդանոցներում 19 տարի մարդկանց բժշկական ծառայություններ ապահովող Քաթինան այժմ ցանկանում է կապ ապահովել նրանց միջև, ովքեր մարդասիրական աշխատանք են կատարում և նրանց, ովքեր պատրաստ են նվիրատվություններ անել՝ եթե վստահ լինեն, որ գումարն ուղղվելու է մարդասիրական գործին: Սուդանում գործող Քաթինայի գլխավորած հիվանդանոցն ինքը վերջին տարիներին զրկվեց 27 դոնոր կազմակերպությունների օգնությունից միայն այն պատճառով, որ հիվանդանոցում չկար մասնագետ, ով կապահովեր բարեգործներին անհրաժեշտ թղթաբանությունը: Մինչդեռ, այսօրվա աշխարհում մերձավորին մեկնած ձեռքը հատուկ նշանակություն ունի, համոզված է Թոմ Քաթինան:
Այդ օգնության կարևորությունը լավ է գիտակցում հայ ժողովուրդը, ժողովուրդ, որ 20-րդ դարի սկզբին Ցեղասպանություն վերապրեց, սակայն, վերստեղծեց իր անկախ պետականությունը, իր ելույթում նշեց ԱՄՆ-ում Հայաստանի դեսպան Վարուժան Ներսեսյանը՝ ավելացնելով, պատահական չէ, որ «Ավրորան» հիմնադրվել է հենց հայերի կողմից. «Մենք՝ հայերս, գիտակցեցինք, որ պետք է ուշքի բերել, արթնացնել մարդկությանը, և «Ավրորա» նախաձեռնությունն ուղղված է հենց դրան. այն փորձում է մարդկանց հանել անտարբերությունից, քանի որ հենց անտարբերությունը ճանապարհ է դեպի փակուղի: Եվ այս անհանգիստ ժամանակներում մեզ միավորում են «Ավրորայի» նման նախաձեռնությունները»:
Իր ելույթում անդրադառնալով Թուրքիայի կողմից Հայոց ցեղասպանության ճանաչման խնդրին, Թոմ Քաթինան նշեց, որ անկեղծորեն չի հասկանում՝ ինչու է Անկարան մերժում սեփական պատմությունը. «Ինչո՞ւ է Թուրքիայի կառավարությունն այդքան համառ, չէ՞ որ այն տեղի է ունեցել վաղ անցյալում: Ի վերջո, փակեք այս հարցը: Առնվազն՝ ճանաչեք այն»:
