15.12.2025 | 22:39
Էրդողանը հայտարարել է, թե 44-օրյա պատերազմի ժամանակ «երկրի թշնամիները Թուրքիային մեղադրում էին Ադրբեջանին աջակցելու մեջ»
Ժամանակն է, որ մտածենք վիզաների ազատականացման թեմայով բանակցությունները մեկնարկելու մասին. Փաշինյան
Քաղաքականություն
01.02.2019 | 18:09
ԵՄ ներկայացուցիչներն արդեն ասել են, որ պատրաստվում են ընդլայնել Հայաստանին տրամադրվող օժանդակության ծավալները, և այս առումով ակնհայտ է, որ ԵՄ-ի հետ հարաբերություններում շատ լավ, գործընկերային մթնոլորտ է հաստատված:
Փետրվարի 1-ին Բեռլինում Գերմանիայի կանցլեր Անգելա Մերկելի հետ համատեղ ասուլիսում այս մասին ասել է ՀՀ վարչապետ Նիկոլ Փաշինյանը՝ պատասխանելով ԵՄ-ի կողմից Հայաստանի տրամադրվող աջակցության ծավալների ավելացման մասին հարցին:
«Չեմ կարծում, որ մենք այդ առումով խոչընդոտներ կունենանք: Ըստ էության՝ Հայաստանում իսկապես ժողովրդավարական էական զարգացումներ են տեղի ունենում, և որևէ կասկած չկա, որ այդ զարգացումները կշարունակվեն»,- նշել է Նիկոլ Փաշինյանը:
Նա, միաժամանակ, հավելել է, որ այդ զարգացումները կշարունակվեն՝ անկախ Հայաստանին տրամադրվող արտաքին աջակցությունից կամ դրա բացակայությունից: «Կարծում եմ, ինչպես ասում են, գնդակը Հայաստանի կառավարության դաշտում է, և մենք պետք է կարողանանք առավել արդյունավետ իրականացնել բարեփոխումների մեր օրակարգը՝ վստահ լինելով, որ աջակցություն կունենանք ինչպես ԵՄ-ի, այնպես էլ ԵՏՄ-ի մեր գործընկերների կողմից»,- հավելել է Նիկոլ Փաշինյանը:
Ինչ վերաբերում է վիզաների ազատականացման հարցին, Նիկոլ Փաշինյանը կարևորում է նախ և առաջ Հայաստանը սեփական քաղաքացիների համար ավելի ու ավելի գրավիչ դարձնելը:
«Մենք պետք է ինստիտուցիոնալ այնպիսի բարեփոխումներ իրականացնենք, որ Հայաստանըն չդիտարկվի որպես, այսպես ասած, փախստականներ մատակարարող երկիր: Հույս ունեմ՝ առավել նպաստավոր պայմաններ կստեղծենք՝ Եվրամիության հետ վիզաների ազատականացման հարցում հաջողությունների հասնելու համար, և ի վերջո, կարծում եմ, ժամանակն է, որ մենք մտածենք այդ թեմայով բանակցությունները մեկնարկելու մասին»,- հավելել է ՀՀ վարչապետը:
