08.08.2026 | 16:59
Վանաձորում, Հրազդանում և Արարատում փոշու պարունակությունը գերազանցել է թույլատրելի սահմանը
Կարծում եմ, որ Ադրբեջանն իր ժողովրդին նախապատրաստում է պատերազմի. Հովհաննես Իգիթյան. ՏԵՍԱՆՅՈՒԹ
Քաղաքականություն
01.02.2019 | 16:10
Ղարաբաղյան հակամարտության վերաբերյալ Ադրբեջանի վարած քաղաքականությանն ու վերջին հայտարարություններին այսօր Ազգային ժողովում լրագրողների հետ զրույցում անդրադարձավ ԱԺ «Իմ քայլը» խմբակցության պատգամավոր Հովհաննես Իգիթյանը։
Նա հիշատակեց վարչապետ Փաշինյանի հայտարարությունն առ այն, որ բանակցային գործընթացին առնչվող որևէ բանաձև նախապես չպետք է հայտարարվի։ Ըստ վարչապետի՝ դա կնշանակի, թե Հայաստանը դուրս է գալիս բանակցային պրոցեսից։
«Անհնար է գնալ բանակցությունների՝ ունենալով վերջում ակնկալվող լուծումը»,- ընդգծեց Հովհաննես Իգիթյանը։
Իգիթյանի խոսքով՝ հայկական կողմն անընդհատ խոսում է զիջումների մասին, մինչդեռ Ադրբեջանը՝ երբեք։ Արցախի մասին Ադրբեջանի առաջարկած կարգավիճակը շատ ավելի ցածր է, քան Արցախի Հանրապետության ներկայիս կարգավիճակը։
«Այն հայտարարությունը, որ կողմերը հասարակությանը խաղաղության պետք է պատրաստեն, առաջին հերթին ուղղված է Ադրբեջանին, քանի որ ինչպես Հայաստանի, այնպես էլ Արցախի Հանրապետության ժողովուրդները պատրաստ են զինադադարի»,- նշեց Հովհաննես Իգիթյանը։
Մեկնաբանելով Ադրբեջանի ԱԳՆ ներկայացուցչի հայտարարությունն այն մասին, թե Ադրբեջանն իր հասարակությանը խաղաղության է պատրաստում, Հովհաննես Իգիթյանը հակադարձեց՝ ասելով, որ Ադրբեջանն իր ժողովրդին ավելի շուտ պատերազմի է նախապատրաստում։
Նելլի Մելքոնյան
