Տարոն Մարգարյանի աշխատակազմի պատասխանատու նախկին պաշտոնյան՝ թաքցված պարգևավճարների մասին

Երևանի նախկին քաղաքային իշխանության կողմից 2017 թվականին շուրջ 287 միլիոն դրամի չափով պարգևատրումներին վերաբերող 12 կարգադրություն չի հրապարակվել: Քաղաքապետ Հայկ Մարությանի մամուլի խոսնակ Հակոբ Կարապետյանի այս հայտարարության առնչությամբ մամուլում տեղ գտած հրապարակումներին ՀՀ գլխավոր դատախազությունն ընթացք է տվել: Factor.am-ին հայտնեց Դատախազության հանրային կապերի բաժնի պետ Արևիկ Խաչատրյանը: Այլ մանրամասներ, ասաց, կհայտնեն ավելի ուշ:

Մեծ աղմուկ բարձրացրած պարգևատրումների ֆոնին քաղաքապետի մամուլի խոսնակը իր ֆեյսբուքյան էջում գրառում էր կատարել՝ հայտնելով, որ 2017 թվականին չի հրապարակվել շուրջ 287 միլիոն դրամի չափով պարգևատրումներին վերաբերող քաղաքապետի 12 կարգադրություն, ինչն, ըստ Կարապետյանի, «Երևան քաղաքում տեղական ինքնակառավարման մասին» օրենքի խախտում է:

Հրապարակելով իր պնդումները փաստող լուսանկարներ՝ Կարապետյանը գրել էր նաև. «Yerevan.am պաշտոնական կայքում կեղծ տեղեկություններ են հրապարակվել․ պարգևատրումների մասին փաստացի գոյություն ունեցող կարգադրությունների հերթական համարների տակ կայքում հրապարակվել են այլ՝ բոլորովին ուրիշ բովանդակությամբ փաստաթղթեր»:

Թե ինչպես է ստացվել, որ պարգևատրումների վերաբերյալ կագադրությունների փոխարեն այլ փաստաթղթեր են հայտնվել Երևանի քաղաքապետարանի պաշտոնական կայքում, Factor.am-ը փորձեց պարզել Երևանի քաղաքապետարանի աշխատակազմի տեղեկատվության և հասարակայնության հետ կապերի վարչության նախկին պետ Արթուր Գեւորգյանից:
«Ես չգիտեմ՝ ինչի մասին է խոսքը, այն, ինչ դուք եք տեսել, նույնը ես եմ տեսել: Թող ստուգեն, ինչ ասեմ, ես տեղյակ չեմ, ուստի չեմ կարող որևէ մեկնաբանություն տալ»,- ի պատասխան մեր հարցին՝ ասաց քաղաքապետարանի նախկին պաշտոնյան:

Երեւանի քաղաքապետ Հայկ Մարությանի մամուլի խոսնակ Հակոբ Կարապետյանը դժվարացավ ասել, թե ինչ մակարդակով են այդ փաստաթղթերը թաքցվել հանրությունից և արդյոք նախկին քաղաքապետի իմացությամբ է դա արվել, փոխարենը ընդգծեց՝ նպատակը բավական զգալի ծավալի պարգևատրումների չափը հանրությունից թաքցնելն է:

Ուշագրավ է, որ 287 մլն դրամ պարգևատրում, ըստ Հակոբ Կարապետյանի, ստացել են սահմանափակ թվով աշխատակիցներ։

Շողիկ Գալստյան