09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Սարի թաղում տուժած լրագրողների բողոքի քննությունը հետաձգվել է
Հասարակություն
30.01.2019 | 14:06
Այսօր Երևանի ընդհանուր իրավասության դատարանի Ավանի նստավայրում հետաձգվել է «Սարի թաղի» գործով տուժողների ներկայացրած բողոքի քննությունը։ Այս մասին Factor.am-ի հետ զրույցում ասաց «Իրավունքների պաշտպանություն առանց սահմանների» ՀԿ նախագահ, փաստաբան Հայկուհի Հարությունյանը։
Նշենք, որ անցած տարվա սեպտեմբերին Հատուկ քննչական ծառայությունը կասեցրել էր 2016 թվականի հուլիսի 29-ին ոստիկանական գործողություններից տուժած անձանց, այդ թվում՝ լրագրողների վերաբերյալ քրեական գործի վարույթը։ Լրագրողները դատարանում բողոքարկում են քրեական գործով վարույթը կասեցնելու ՀՔԾ-ի և բողոքը մերժելու մասին ՀՀ գլխավոր դատախազության կողմից կայացված որոշումները։
Տուժողների ներկայացուցիչներն այսօր դատարան միջնորդություն են ներկայացրել՝ պահանջելով, որ քննիչը որոշակի նյութեր ներկայացնի դատարան:
«Խնդիրն այն էր, որ Սարի թաղում կիրառված հատուկ միջոցների քանակի, կիրառման օրինականության վերաբերյալ հարց էինք բարձրացրել և քննիչը բերել էր ընդամենը մի փաստաթուղթ, որտեղ նշվում էր, թե քանի ոստիկան քանի հատուկ միջոց է օգտագործել, բայց թե ո՞վ է հրաման արձակել, որ միջոցները հենց այդ պահին կիրառվեն, դրա վերաբերյալ նյութեր չէր բերվել։ Մեզ համար էական է, որ տեսնենք՝ այդ հրամանը տվողն ո՞վ է եղել։ Հիմա միջնորդել ենք, որ այդ փաստաթղթերը բերի քննիչը»,- Factor.am-ի հետ զրույցում ասաց փաստաբան Հայկուհի Հարությունյանը։
Ռոբերտ Անանյան
