Ոստիկանությունը՝ քրեական հեղինակությունների տեղաշարժը սահմանափակելու մասին. ՏԵՍԱՆՅՈՒԹ

Մամուլն այսօր գրել էր, որ օրերս մի քանի հայ քրեական հեղինակություններ փորձել են Վրաստանի տարածքով գնալ Ռուսաստան, սակայն հայ-վրացական սահմանին վրացի սահմանապահներն արգելել են նրանց մուտքը իրենց երկրի տարածք:

Ըստ մամուլի տեղեկությունների՝ Հայաստանի իրավապահները վրացի գործընկերներին են փոխանցել հայ քրեական հեղինակությունների և  քրեական անցյալ ունեցող անձանց ցուցակը, և հիմա վրացի սահմանապահները, օգտվելով այդ տվյալների բազայից, արգելում են այդ մարդկանց մուտքը իրենց երկիր:

Այսօր հրավիրված մամուլի ասուլիսի ժամանակ  ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանն, անդրադառնալով այս հրապարակմանը, ընդգծեց․

«Թե՛ ՀՀ իրավապահների, թե՛ մյուս երկրների իրավապահների համար մարդու տեղաշարժը սահմանափակելու միայն օրինական միջոցներ կան։ Մենք մեր վրացի գործընկերների հետ սերտ համագործակցության մեջ ենք, սակայն կրկնում ենք, որ մարդու քրեական անցյալը կամ քրեական հեղինակություն լինելը նրա տեղաշարժի սահամանփակման համար հիմք չի կարող հանդիսանալ, ուստի մեր կողմից այդ տեղաշարժը  սահմանափակելու նախաձեռնություն չէր կարող լինել»։

Ասուլիսին մասնակից ՀՀ ոստիկանության շտաբի պետ Արմեն Ղուկասյանն էլ հարցի վերաբերյալ նկատեց․

«ՀՀ-ն հետամուտ է անձնական տվյալների գաղտնիության պահպանմանը։ Եթե միջազգային պայմանագրեր էլ այս առումով չունենք,նման տեղեկություններ չենք կարող տրամադրել․ դրանք տրամադրվում են բացառապես օրենքով սահմանված կարգով»։

Մանրամասները՝ տեսանյութում։

Աղավնի Սուքիասյան