18.12.2025 | 20:56
Ոստիկանները պիտի կարգ պահեին, բայց ամբողջությամբ թերացել են․ Գեղամ Մանուկյան. ՏԵՍԱՆՅՈՒԹ
581 համաներվածից 30-ն արդեն 42 հանցագործություն է կատարել. Արմեն Ղուկասյան. ՏԵՍԱՆՅՈՒԹ
Հասարակություն
30.01.2019 | 12:43
ՀՀ ոստիկանությունն այսօր հրավիրված մամուլի ասուլիսում ամփոփեց 2018 թվականի օպերատիվ-ծառայողական գործունեության արդյունքները: Ոստիկանության շտաբի պետ Արմեն Ղուկասյանի ներկայացմամբ՝ 2018թ. ընթացքում գրանցված հանցագործությունների թիվն աճել է 11.2 տոկոսով կամ 2.267 դեպքով:
Ոստիկանության շտաբի պետի խոսքով՝ պրոֆեսիոնալ հանցագործները մշտապես տարբերվում են, որովհետև ներդրված ջանքերի համապատասխան՝ փորձում են ստանալ մաքսիմալ արդյունք՝ առանց տարբերություն դնելու, թե ում բնակարան են մտնում:
Անդրադառնալով ավելի վաղ փոխոստիկանապետի, դատախազի, Վճռաբեկ դատարանի նախագահի, ՔԿ նախկին նախագահի և այլ անձանց բնակարաններում կատարված գողություններին՝ Արմեն Ղուկասյանը նշեց. «Այս հանգամանքը խիստ մտահոգում է ոստիկանությանը։ Մենք նախատեսում ենք միջոցառումների ծրագիր, որը շուտով կներկայացվի հանրությանն ու կընդունվի Կառավարության կողմից: Ոստիկանության պետի կողմից էլ կա հանձնարարական, որ հսկողություն իրականացվի բնակարանային գողություններ կատարած անձնանց նկատմամբ: Միայն նշեմ, որ իրականացված վերջին համաներմամբ ազատ է արձակվել 581 անձ, որից 30-ը կատարել է 42 հանցագործություն, այդ թվում՝ 1 ավազակություն, 28 գողություն, որից 10-ը բնակարանային և այլն»,- ասաց Արմեն Ղուկասյանը:
Խոսելով կրկնահանցագործության և համաներման կապի մասին՝ ոստիկանության շտաբի պետը նշեց, որ նման ուսումնասիրություն կատարվել է 10 տարի առաջ, ըստ որի՝ համաներումից հետո հաջորդ տարում արձանագրվում է հանցագործությունների աճ:
«Կա նման կապ, բայց դա չի նշանակում, որ այդ մարդասիրական քայլը, որը պետությունը ցուցաբերում է հանցագործություն կատարածների նկատմամբ, սխալ է: Դա քրեական քաղաքականության մաս է կազմում, և կարծում ենք, որ նման անձինք պետք է գտնվեն հսկողության տակ: Սակայն գործող օրենսդրությունը լիարժեք չի տալիս հնարավորություն այդ մարդկանց պահել անհրաժեշտ հսկողության տակ»,-նկատեց Ղուկասյանը:
Մանրամասները՝ տեսանյութում
Աղավնի Սուքիասյան
