«Լիդիան Արմենիա»֊ն չի բացառում դատական հայցն ընդդեմ կառավարության. Արմեն Ստեփանյան. ՏԵՍԱՆՅՈՒԹ

«2018 թվականի հունիսի 22-ից ճանապարհները դեռևս մնում են ապօրինաբար փակ, ինչի պատճառով շինարարական աշխատանքները դադարեցված են»,- ներկայացնելով այս պահին Ամուլսարի հանքավայրում ստեղծված իրավիճակը, ասաց «Լիդիան Արմենիա» ընկերության կայուն զարգացման գծով փոխնախագահ Արմեն Ստեփանյանը։

Նրա ներկայացմամբ՝ ընկերությունն արդեն իսկ կրել է տասնյակ միլիոնավոր դոլարների կորուստներ, շուրջ 1300 աշխատակից զրկվել է աշխատանքից։ Արմեն Ստեփանյանը չի բացառում, որ «Լիդիան Արմենիա»-ն կրած կորուստները փորձի հետ ստանալ կառավարությունից՝ դատարան հայց ներկայացնելու եղանակով․ «Բոլոր օպցիաներն այսօր բաց են։ Ամեն ինչ հնարավոր է»։

Հիշեցնենք, որ որոշ ժամանակ առաջ Բնապահպանության նախարարության տեսչական մարմինը ստուգումներ էր իրականացրել, որից հետո Ամուլսարի հանքի աշխատանքները կասեցվել էին։ Որպես կասեցման հիմք նշվել էր շրջակա միջավայրի ազդեցության գնահատման նոր փորձաքննություն նշանակելու անհրաժեշտությունը։ Բնապահպանության նախարարությունը աշխատանքային խումբ էր ստեղծել, որը տարածք այցելելուց հետո կարծիք էր կազմել և այն տրամադրել Բնապահպանության նախարարությանը։ Արմեն Ստեփանյանի խոսքով՝ խմբի ներկայացրած գործոնները, Բնապահպանության նախարարության գնահատմամբ, չէին կարող համարվել նոր էկոլոգիական գործոններ։

Նախարարության այս որոշումը վիճարկվում է դատարանում․ «Մենք մնում ենք այն կարծիքին, որ որոշումը միանգամայն սխալ է և պետք է բեկանվի»,- ասաց «Լիդիան Արմենիա» ընկերության կայուն զարգացման գծով փոխնախագահը։

Ռոբերտ Անանյան