Եվրոպական հանձնաժողովը շատ դրական է տրամադրված ՀՀ քաղաքացիների՝ ԵՄ երկրներ առանց արտոնագրի մուտքին. Յ. Հան

«Եվրոպական միությունը բարձր է գնահատում այն, որ Հայաստանի ու Ադրբեջանի արտգործնախարարները պարբերաբար հանդիպումներ են ունենում: Ինչպես նաև կարևորվում է վարչապետ Փաշինյանի ու Ալիևի հանդիպումը»,- Արտգործնախարարությունում հրավիրված ասուլիսի ընթացքում ասաց Եվրոպական միության հարևանության քաղաքականության և ընդլայնման հարցերի հանձնակատար Յոհաննես Հանը:

Նա նշեց, որ դեռևս կոնկրետ ամսաթիվ չկա, թե երբվանից Հայաստանի քաղաքացիները կկարողանան Եվրամիության երկրներ մեկնել առանց վիզայի: «Մենք պարտավոր ենք այս հարցը քննարկել մեր անդամ երկրների հետ: Ես ենթադրում եմ, որ նախքան Եվրոպական խորհրդարանի ընտրությունները չեն լինի այս առումով նախաձեռնություններ: Բայց Եվրոպական հանձնաժողովը շատ դրական է տրամադրված այս հարցում»,- նշեց Յոհաննես Հանը:

Կա պնդում, որ Արևելյան գործընկերության երկրների շարքում ամենաքիչ ֆինանսական աջակցությունն է ստանալու Հայաստանը: Յոհաննես Հանը համաձայն չէ: «Եթե համեմատում ենք տարեկան հատկացումները, ամենևին էլ Հայաստանը չէ ամենաքիչ ֆինանսական աջակցությունն ստացողը: Ավելի քիչ ստացողներ էլ կան»,- ասաց պարոն Հանը:

Հանձնակատար Յոհաննես Հանը հրաժարվեց մեկնաբանել Ռոբերտ Քոչարյանի՝ քաղբանտարկյալ լինելու պնդումով հարցին. «Մենք սովորաբար չենք մեկնաբանում անհատական գործերը, հասկանալով նաև իրավունքի գերիշխանության խնդիրը, դա դատական համակարգի գործն է, և մենք չպետք է մեկնաբանենք, որպեսզի չազդենք այս կամ այն ուղղությամբ: Ուստի խնդրում եմ ըմբռնումով մոտենալ, որ ես մեկնաբանություն չեմ անի»:

Ռոբերտ Անանյան