19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
ՅՈՒՆԻՍԵՖ-ը 3.9 մլրդ ԱՄՆ դոլարի հավաքագրման կոչ է անում 41 մլն երեխաների օգնություն ցուցաբերելու համար
Քաղաքականություն
29.01.2019 | 13:38
ՅՈՒՆԻՍԵՖ-ն այսօր 3,9 միլիարդ ԱՄՆ դոլարի հավաքագրման կոչ արեց՝ հումանիտար ճգնաժամի մեջ գտնվող երեխաներին իր աջակցությունը շարունակելու համար: Հակամարտությունների, բնական աղետների և այլ արտակարգ իրավիճակների պատճառով միլիոնավոր երեխաներ զրկված են կենսական անհրաժեշտության ծառայություններից, ինչը ռիսկի է ենթարկում նրանց անվտանգությունը, բարեկեցությունն ու ապագան. տեղեկացնում է ՅՈՒՆԻՍԵՖ-ի հաղորդակցման ծրագրի ղեկավար Զառա Սարգսյանը:
«Միլիոնավոր երեխաներ անասելի բռնության, սթրեսի և տրավմայի են ենթարկվում այսօր հակամարտությունների կամ աղետների պատճառով»,- ասում է ՅՈՒՆԻՍԵՖ-ի գլխավոր տնօրեն Հենրիետա Ֆորը: «Երեխայի պաշտպանության մեր ծրագրերի արդյունքը չենք կարող թերագնահատել: Եթե երեխաները անվտանգ խաղալու տեղ չունենան, եթե նրանք չկարողանան վերամիավորվել իրենց ընտանիքների հետ և չստանան սոցիալ-հոգեբանական աջակցություն, ապա չեն կարողանա ապաքինվել պատերազմի անտեսանելի վերքերից»:
Իր ամենամյա «Հումանիտար գործողություն հանուն երեխաների» դրամահավաքի կոչի շրջանակներում ՅՈՒՆԻՍԵՖն այս տարի ծրագրել է 59 երկրներում ապրող 41 միլիոն երեխաների ապահովել մաքուր ջրով, սննդով, կրթությամբ, առողջապահական և պաշտպանության ծառայություններով: Հավաքագրված գումարից 385 միլիոն ԱՄՆ դոլար ծախսվելու է երեխայի պաշտպանության ծրագրերի համար, որից 121 միլիոնը կուղղվի միայն Սիրիայի ճգնաժամից տուժած երեխաների պաշտպանությանը:
«Այս երեխաներին աջակցություն ցուցաբերելը կրիտիկական նշանակություն ունի, բայց առանց նշանակալի և միավորված միջազգային գործողության, շատերն ուղղակի կանտեսվեն»,- ասաց ՅՈՒՆԻՍԵՖ-ի արտակարգ իրավիճակների ծրագրերի տնօրեն Մանուել Ֆոնթեյնը: «Միջազգային հանրությունը պետք է արտակարգ իրավիճակներում հայտնված երեխաներին աջակցելու պարտավորություն ստանձնի»:
Հավաքագրվող գումարը կծախսվի հետևյալ 5 ուղղություններով՝ Սիրայից փախստականների և նրանց ընդունող համայնքների՝ Եգիպտոսի, Հորդանանի, Լիբանանի, Իրաքի և Թուրքիայի աջակցությանը (904 ԱՄՆ դոլար), ինչպես նաև Եմենին (542,3 ԱՄՆ դոլար), Կոնգոյի Ժողովրդավարական Հանրապետությանը (326,1 ԱՄՆ դոլար), Սիրիային (319,8 ԱՄՆ դոլար) և Հարավային Սուդանին (179,2 ԱՄՆ դոլար):
Հավաքագրված գումարով և գործընկերների աջակցությամբ ՅՈՒՆԻՍԵՖ-ը 2019թ-ին պատրաստվում է՝
- 4 միլիոն երեխայի և խնամատարի սոցիալ-հոգեբանական աջակցություն տրամադրել,
- 43 միլիոն մարդու մաքուր ջուր մատակարարել,
- 10,1 միլիոն երեխայի ապահովել տարրական կրթությամբ,
- 10,3 միլիոն երեխայի պատվաստել կարմրուկի դեմ,
- 4.2 միլիոն երեխայի բուժել ծանր թերսնուցումից:
2018թ. առաջին տասն ամիսների ընթացքում ՅՈՒՆԻՍԵՖ-ի աջակցությամբ՝
- 3,1 միլիոն երեխա և խնամատար սոցիալ-հոգեբանական օգնություն է ստացել;
- 35,3 միլիոն մարդու մաքուր ջուր է մատակարարվել;
- 5,9 միլիոն երեխա ստացել է կրթություն;
- 4,7 միլիոն երեխա պատվաստվել է կարմրուկի դեմ;
- 2.6 միլիոն երեխա բուժվել է ծանր թերսնուցումից:
