Արթուր Դավթյանը՝ իր հրաժարականի և Մանվել Գրիգորյանի մեղադրանքի լրացման մասին. ՏԵՍԱՆՅՈՒԹ

Գլխավոր դատախազությունը Մանվել Գրիգորյանի գործով հանդես է գալիս որպես մեղադրանքի կողմ, հետևաբար՝ կողմնակալ դիրքորոշում ներկայացնելու մասին խոսք լինել չի կարող: Հունվարի 28-ին Բանակի օրվա առիթով պաշտպանության նախարարության կազմակերպված միջոցառումից առաջ լրագրողների հետ զրույցում ասաց ՀՀ գլխավոր դատախազ Արթուր Դավթյանը՝ պատասխանելով Մանվել Գրիգորյանի պաշտպանի հայտարարության մասին հարցին, թե գլխավոր դատախազն անձամբ է հանդիպել Գրիգորյանի կալանավորումը պահանջող ցուցարարների հետ և ասել, որ համամիտ է նրանց տեսակետին:

«Շատ սխալ մեկնաբանություն է դա: Գաղտնիք չէր մեր կողմից բողոք ներկայացնելը, գիտեք՝ մինչև իմ իջնելն էր հրապարակվել: Բնականաբար՝ դատախազությանն իր ունեցած հիմքերով, փաստերով ներկայացրել է բողոք: Այնպես որ՝ որևէ կողմնակալ դիրքորոշում ներկայացնելու մասին խոսք լինել չի կարող»,- նշեց Արթուր Դավթյանը՝ ընդգծելով, որ ցուցարարներին էլ հորդորել է չձեռնարկել այնպիսի գործողություններ, որոնք կարող էին դիտարկվել որպես ճնշում արդարադատության վրա:

Նա նշեց նաև, որ բավարար ու ակնհայտ ապացույցների դեպքում Մանվել Գրիգորյանի մեղադրանքը կլրացվի. «Քրեական գործերով ճնշող մեծամասնության դեպքերում սկզբնական և ավարտական փուլերով մեղադրանքները տարբերվում են»:

Իսկ թե ինչ դրվագներ են ներգրավվելու գործում, Արթուր Դավթյանն այս պահին չկարողացավ ասել: «Քննությունը դեռևս չի ավարտվել։ Կան դրվագներ, որոնցով բավարար չափով ապացույցներ կան, կան դրվագներ, որոնցով դեռ քննությունն ընթանում է, և ապացույցների ծավալը պետք է մեզ թույլ տա՝ որոշելու՝ փոխելու ենք, թե՞ չենք փոխելու»,- նշեց գլխավոր դատախազը:

Իր հնարավոր հրաժարականի մասին հարցին էլ Արթուր Դավթյանը հրաժարվեց պատասխանել: «Ինձ թվում է՝ լուրջ հարցերն ավարտվեցին»,- ասաց գլխավոր դատախազն ու հրաժեշտ տվեց լրագրողներին:

Մանրամասները՝ տեսանյութում

Նելլի Մելքոնյան