10.12.2025 | 18:50
Ալավերդիից դեպի «Սանահին» թաղամաս և Ակներ տանող ճանապարհը ժամանակավորապես կփակվի
Հնարավոր է, որ սթրեսն էլ պատճառ դառնար այսպիսի վախճանի. Մհեր Եղիազարյանի պաշտպան
Հասարակություն
26.01.2019 | 19:40
Երևան քաղաքի ընդհանուր իրավասության դատարանն օրեր առաջ մերժել է «Նուբարաշեն» քրեակատարողական հիմնարկում այսօր մահացած Մհեր Եղիազարյանին գրավով ազատ արձակելու պաշտպանական կողմի միջնորդությունը: Այս մասին Factor.am-ի հետ զրույցում ասաց Մհեր Եղիազարյանի պաշտպան Վահե Արմենակյանը:
Պաշտպանը նաև հայտնեց, որ Ազգային ժողովի երկու պատգամավոր` Սերգեյ Բագրատյանը և Նաիրա Զոհրաբյանը, երաշխավորություն էին տվել, որ ազատության մեջ հայտնվելու դեպքում Եղիազարյանը պատշաճ վարքագիծ կդրսևորեր, առաջարկվել էր նաև գրավ` 5 միլիոն դրամի չափով, բայց այդուհանդերձ դատարանը մերժել էր իրենց կողմից ներկայացված միջնորդությունը:
«Եթե ազատ արձակվեր, շատ հնարավոր է՝ ամեն բան այլ կերպ ընթանար: Մարդը հակված էր դեպի դրականը, եթե իրեն չես ազատում, և ինքը մնում է նույն վիճակում հացադուլի մեջ, հնարավոր է, որ սթրեսն էլ պատճառ դառնար այսպիսի վախճանի»,- ասաց պաշտպանը
Միջնորդության վերաբերյալ ֆեյսբուքի իր էջում գրառում է արել նաև ԱԺ «Բարգավաճ Հայաստան» խմբակցության պատգամավոր Նաիրա Զոհրաբյան՝ նշելով. «Այսօր 44-օրյա հացադուլից հետո քրեակատարողական հիմնարկում մահացավ լրագրող Մհեր Եղիազարյանը: Նշում են, սակայն, որ նա 10 օր արդեն հացադուլից դուրս էր եկել: Որպես մարդու իրավունքների և հանրային հարցերի մշտական հանձնաժոովի նախագահ, պահանջում եմ պարզաբանում արդարադատության նախարարից և դատարանից` ինչու՞ չբավարարվեց իմ, որպես պատգամավորի, անմիջապես Մհերի կալանավորումից հետո ներկայացրած միջնորդությունը` փոխելու լրագրողի խափանման միջոցը: Եվ դեռ քանի՞ մարդ պետք է մահանա, որպեսզի հասկանանք, որ այսպես շարունակել չի կարելի: Ուղղակի չի կարելի»:
