15.12.2025 | 19:13
Լուվրը ժամանակավորապես փակ է․ աշխատակիցները գործադուլ են սկսել
Հայաստանի և Վենեսուելայի իրադարձությունների միջև որևէ ասոցիացիա չի կարող լինել. Փաշինյան. ՏԵՍԱՆՅՈՒԹ
Քաղաքականություն
25.01.2019 | 14:13
Անցյալ տարի Հայաստանում և այս օրերին Վենեսուելայում տեղի ունեցող իրադարձությունների միջև որևէ ասոցիացիա չի կարող լինել: Հունվարի 25-ին Մոսկվայում ԵՀԿ նիստից հետո տեղի ունեցած ճեպազրույցում այս մասին հայտարարել է ՀՀ վարչապետ Նիկոլ Փաշինյանը:
Նրա խոսքով՝ Հայաստանի և Վենեսուելայի իրադարձությունները տարբեր են: «Բարեբախտաբար՝ մեզ մոտ բախումներ չեն եղել, չեն եղել զոհեր, իսկ Վենեսուելայում, ցավոք, զոհեր կան: Երկրորդ՝ Հայաստանում տեղի ունեցած գործընթացն ամբողջությամբ համապատասխանել է այն գործընթացներին, որոնք նախատեսված են ՀՀ Սահմանադրությամբ և օրենսդրությամբ: Վենեսուելայի դեպքում հասկանալի չէ՝ որքանով է այդ ամենը համապատասխանում երկրի Սահմանադրությանը»,- նշել է վարչապետը:
Նիկոլ Փաշինյանի առաջին տպավորությունն այն է, որ վենեսուելական իրադարձությունները հակասահմանադրական են: «Ամեն դեպքում՝ ցանկացած որոշում պետք է առաջին հերթին ընդունելի լինի Վենեսուելայի ժողովրդի համար»,- ամփոփել է նա:
Հիշեցնենք, որ Վենեսուելայում հակակառավարական ցույցեր են տեղի ունենում ընդդեմ երկրի նախագահ Նիկոլաս Մադուրոյի իշխանության: Ավելի վաղ ընդդիմադիր խորհրդարանի նախագահ Խուան Գուաիդոն իրեն երկրի ժամանակավոր առաջնորդ էր հռչակել:
Հավելենք, որ ԱՄՆ-ի, Արգենտինայի, Կանադայի, Պերուի, Կոլումբիայի և մի շարք այլ երկրների իշխանություններն աջակցում են ցուցարարներին՝ պահանջելով Մադուրոյի հրաժարականը:
