10.10.2026 | 14:28
ԵՄ-ն շնորհավորել է Երևանի 2808-ամյակը
Դավոսի հանդիպումից ո՛չ Ալիևը, ո՛չ ես արդյունք չէինք ակնկալում. Նիկոլ Փաշինյան. ՏԵՍԱՆՅՈՒԹ
Քաղաքականություն
25.01.2019 | 14:10
Իլհամ Ալիևի հետ հանդիպումից ոչ մի արդյունք չէր նախատեսվում, և ոչ մի արդյունք, ըստ էության, չկա: Հունվարի 25-ին Մոսկվայում ԵՏՀ նիստից հետո տեղի ունեցած ճեպազրույցում ասել է ՀՀ վարչապետ Նիկոլ Փաշինյանը՝ լրագրողների խնդրանքով մեկնաբանելով Դավոսում Ադրբեջանի նախագահ Իլհամ Ալիևի հետ ոչ պաշտոնական ձևաչափով հանդիպումը:
«Փաստացի, դրանք բանակցություններ չէին, դա ոչ պաշտոնական շփում էր: Մենք այդպես շփվել ենք նաև Դուշանբեում և Սանկտ Պետերբուրգում: Իհարկե՝ Դուշանբեի հանդիպումից հետո կոնկրետ արդյունքներ եղան: Այսինքն՝ ո՛չ ես, ո՛չ Ալիևը, ո՛չ էլ որևէ այլ մեկը որևէ արդյունք չէինք ակնկալում այդ հանդիպումից»,- հավելել է նա:
Ըստ Նիկոլ Փաշինյանի՝ նման ոչ պաշտոնական հանդիպումների ժամանակ ինքն ու Ալիևը խոսում են ԼՂ հիմնախնդրի շուրջ իրենց ու հայ և ադրբեջանցի ժողովուրդների ընկալման մասին:
Հարցին՝ արդյոք Ալիևի հետ հանդիպման ժամանակ տարածքների հանձնման և բանակցային սեղան Ստեփանակերտի վերադարձի հարցերը քննարկվե՞լ են, Նիկոլ Փաշինյանը պատասխանել է, որ հանդիպման ընթացքում անդրադարձ է եղել հրապարակայնորեն արված իր բոլոր հայտարարություններին:
«Ես բազմիցս ասել եմ, որ այդ բանակցություններում կարող եմ ներկայացնել Հայաստանը, չեմ կարող ներկայացնել Արցախի Հանրապետությունն այն պարզ պատճառով, որ Արցախի քաղաքացիները չեն մասնակցում Հայաստանի ընտրություններին, այսինքն՝ իրենք ինձ չեն ընտրել: Նրանք իրենց նախագահին են ընտրել, ունեն իրենց կառավարությունը, իրենց խորհրդարանը: Այդ պատճառով ես չեմ կարող բանակցություններ վարել Արցախի անունից, ես կարող եմ բանակցություններ վարել Հայաստանի Հանրապետության անունից»,- ասել է Փաշինյանը:
Նա հավելել է, որ լրագրողներին և քաղաքացիներին հետաքրքիր է, թե ինչի մասին են խոսել Ալիևի հետ, բայց զուտ էթիկապես ընդունելի չի համարում հայտարարել զրույցի բոլոր մանրամասները:
