Հանձնարարեք ԱԱԾ-ին ճշտել ներկայացրած փաստերիս իսկությունը. փաստաբանը՝ Մանվել Գրիգորյանի կալանքի առնչությամբ

Ազգային ժողովի նախկին պատգամավոր, գեներալ Մանվել Գրիգորյանի պաշտպան Լևոն Բաղդասարյանը տեղեկացնում է, որ պետական մարմինները անօրինականություններ են գործում և եթե դրա առաջը չառնեն, կունենանք նաև մեծ խնդիր պետական անվտանգության հետ։

«Պետական միջգերատեսչական հանձնաժողովն արձանագրել է, որ թեպետ Մանվել Գրիգորյանի հիվանդությունները ծանր են, բայց կալանքը կրելու ընթացքում կյանքին վտանգ չեն սպառնա։ Սակայն փաստել են նաև, որ այդ հիվանդությունները կարող են կյանքին վտանգ սպառնալ, բայց չեն կարող ասել, թե երբ։ Այս պետական միջգերատեսչական հանձնաժողովի եզրակացությունը վերջում, որպես հանձնաժողովի նախագահ, ստորագրել է առողջապահության փոխնախարարի անունից մի անձնավորություն, որն այս պահին արդեն Առողջապահության նախարարության աշխատակից չէ: Պարո՛ն վարչապետ, ահա պետական կառավարական միջգերատեսչական հանձնաժողովի պատկերը, որի տված եզրակացության հիման վրա Գրիգորյանին հետ ուղարկեցին բանտախուց։ Հաշվի առնելով, որ այս դրվագը ուղղակի աղերս ունի պետական անվտանգության հետ, խնդրում եմ հանձնարարել ԱԱԾ-ին ճշտել ներկայացրած փաստերիս իսկությունը»,- ասաց Մանվել Գրիգորյանի պատշտպանը՝ կոչ անելով վարչապետին  պարզել՝ ով և ինչպես ազդեց այդ հանձնաժողովի վրա, որ Մանվել Գրիգորյանի առողջության վերաբերյալ նման եզրակացություն տրվեց։

Վերջինս անդրադարձավ նաև պաշտպանների հասցեին հնչող քննադատություններին և նշեց, որ այդ խնդրի կարգավորման համար պետք է ոչ թե օրենքի մեջ փոփոխություն մտցնել, այլ երկրում մշակույթ մտցնել՝ հարգել իրավապաշտպանի մասնագիտությունը, իսկ այդ մշակույթի առաջին կրողը պետք է լինի հենց վարչապետ Նիկոլ Փաշինյանը։

«Ժողովուրդը Ձեզ է ընտրել, Ձեզ է լսում, պարո՛ն վարչապետ, եթե այսօր այս մշակույթը չձևավորվի, վաղը կլինի ոչ թե ուշ, այլ ուշացած և մաթեմատիկական ճշգրտությամբ հետ է գալու և կպնի Ձեր որդեգրած գաղափարներին։ Հայաստանում պետք է բացառել ընտրովի արդարադատությունը և նախաքննությունը։ Ես պաշտպանում եմ ոչ թե անձին, այլ նրա խախտված իրավունքը»,- ասաց պաշտպանը։