09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
«Սենսացիա չփնտրել»․ Սմբատ Գոգյանը իր տեղակալին պարգևատրել է աշխատավարձի 180 տոկոսով
Հասարակություն
24.01.2019 | 11:34
Բարձրագույն որակավորման կոմիտեի նախագահ Սմբատ Գոգյանը իր տեղակալին՝ Լիլիթ Մկրտչյանին, պարգևատրել է աշխատավարձի 180 տոկոսի չափով: Տեղեկությունը Factor.am-ի հետ զրույցում հաստատեց Սմբատ Գոգյանը:
Հարցին՝ աշխատակազմում էլի նման բարձր պարգևավճարներ են եղել, Գոգյանը պատասխանեց. «Ես ինձ ընդհանրապես չեմ պարգևատրել, իսկ մյուս աշխատողները ստացել են մոտավորապես 80 տոկոսի չափով: Տեղակալին 180 տոկոս եմ տվել, որովհետև ինքն ամեն օր 8 անց կեսից եկել է, շատ երկար աշխատում էր և ամենաէֆեկտիվ աշխատողն է՝ օրենսդրական դաշտը շատ լավ յուրացրել է»:
Գոգյանը մեզ հետ զրույցում հայտարարեց, որ Բարձրագույն որակավորման կոմիտեում սենսացիա չկա, պետք է սենսացիա փոնտրել այլ կառույցներում:
Մեր դիտարկմանը՝ աշխատավարձի 180 տոկոսի չափով պարգևատրելը սենսացիա չէ՞, Գոգյանը արձագանքեց. «Նա քաղծառայող չէ, ոչ քաղծառայողները պարգևավճար չեն ստանում, եթե քաղծառայողների համար պարգևավճարների ֆոնդ կա, որը տարվա մեջ երկու անգամ ստանում են, ապա հայեցողական պաշտոնյաների համար պարգևատրման ֆոնդ չկա, դրա համար մենք կոլեկտիվով զրուցեցինք և արդար համարեցինք, որ տարվա կտրվածքով բոլորի պարգևատրումը հավասար լինի»:
Մինչ այս գրել էինք, որ Երևանի քաղաքապետ Հայկ Մարությանը պարգևատրման համար հատկացրել է 974 հազար ԱՄՆ դոլարին համարժեք 474 միլիոն դրամ։ Պարգևատրումներ և ինքնապարգևատրումներ են արել նաև մարզպետներն ու պետական այլ գերատեսչություններ։
Հայկ Վարդանյան
