ՔԿ-ն հերքում է․ Հայաստանի երիտասարդական հիմնադրամի գործադիր տնօրենին մեղադրանք առաջադրված չէ

ՀՀ քննչական կոմիտեն հերքում է  Հայաստանի երիտասարդական հիմնադրամի տնօրենին կալանավորելու միջնորդություն ներկայացնելու մասին տեղեկությունը։

«Այսօր մամուլում հրապարակված լուրը, թե Երիտասարդական հիմնադրամի տնօրենին կալանավորելու միջնորդություն է ներկայացվել չի համապատասխանում իրականությանը։ Այս պահի դրությամբ Հայաստանի երիտասարդական հիմնադրամի գործադիր տնօրենին մեղադրանք առաջադրված չէ»,- Factor.am-ի հետ զրույցում ասաց ՀՀ քննչական կոմիտեի լրատվության բաժնի պետ Նաիրա Հարությունյանը։

Հիշեցնենք, որ ըստ «Ժողովուրդ» օրաթերթի՝ Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանի դեմ  հարուցված քրեական գործը նոր ընթացք է ստացել: Արդեն երեք օր է՝ նախաքննական մարմինը սպասում է Դատախազության պատասխանին, սակայն Դատախազությունում անսովոր կերպով լռում են:

Թերթը նաև հիշեցրել է․ «2018 թվականի հունիսի 1-ին  ՀՀ քննչական կոմիտեն հայտնել էր, որ  մայիսի 25-ին Հայաստանի երիտասարդական հիմնադրամի հոգաբարձուների խորհրդի անդամ, ԱԺ պատգամավոր Կարեն Ավագյանը դիմում է ներկայացրել  առ այն,  որ ապրիլի 6-ին Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանը հիշյալ հիմնադրամի անունից ինքն իր հետ կնքել է 326 մլն ՀՀ դրամի փոխառության պայմանագիր: Կատարվածի կապակցությամբ հարուցվել է քրեական գործ՝ առանձնապես խոշոր չափերով յուրացում կատարելու դեպքի առթիվ, ՀՀ քրեական օրենսգրքի 179-րդ հոդվածի 3-րդ մասի 1-ին կետով»։