Այսօր Վերաքննիչ դատարանը բավարարեց Ազգային ժողովի նախկին պատգամավոր, ԵԿՄ նախկին նախագահ Մանվել Գրիգորյանին կալանավորելու դատախազության միջնորդությունը։ Հիշեցնենք՝ Գրիգորյանի խափանման միջոց կալանավորումն առաջին ատյանի դատարանը փոխարինեց 25 միլիոն դրամ գրավով և նրան ազատ արձակեց:
Գեներալը մեղադրվում է ապօրինի կերպով ռազմամթերք ձեռք բերելու և պահելու, ինչպես նաև առանձնապես խոշոր չափերով գույք հափշտակելու մեջ։ Բացի այդ՝ ԱԱԾ-ն Գրիգորյանին պատկանող տարածքներից հայտնաբերել էր «Զինվորի բաժին» նշագրումով սնունդ, դպրոցականների նամակներ՝ ուղղված ապրիլյան պատերազմի մասնակիցներին և այլ պարագաներ:
Մանվել Գրիգորյանին կրկին կալանավորելու առնչությամբ Factor.am-ը զրուցել է Արցախի Հանրապետության Ազգային ժողովի նախկին պատգամավոր, Մարտական խաչի ասպետ Վահան Բադասյանի հետ:
-Պարո՛ն Բադասյան, ինչպե՞ս եք գնահատում դատարանի որոշումը:
-Նորմալ է, բայց ես գործընթացի վերաբերյալ այլ կարծիք ունեմ: Մեղադրականը, որ դրված է «տուշոնկայի» մասով է, սակայն ինձ համար կարևոր չէ` Մանվելը կդատվի՞, թե՞ չէ, երբ հիշում եմ, թե Մանվելն ինչ վնասներ է տվել բարոյական, իրավական տեսանկյունից մեր բանակին և ժողովրդին… ես լավ եմ հիշում՝ ինչպես էր 1993-94 թվականնեին Մանվելը իր բռի, կոպիտ գործողություններով աչքի ընկնում, ինչպես էր թալանում մարդկանց, խլում նրանց սեփականությունը, և հավատն ընդհանրապես երկրի ղեկավարության նկատմամբ վերացնում, հետագայում Էջմիածնում տեղի ունեցած հանելուկային սպանությունները… ահա այս ամենին պետք է գնահատական տրվի: Դրա գնահատականը կոմպլեկտ է և պետք է առնչվի իր հովանավորների՝ առաջին, երկրորդ և երրորդ նախագահների հետ:
-Ի՞նչ եք կարծում՝ ազատության մեջ մնալու դեպքում Մանվել Գրիգորյանն իրո՞ք կարող էր վտանգ ներկայացնել, ինչպես պնդում էին էջմիածինցիները:
-Ոչ, չեմ կարծում: Մանվել Գրիգորյանը երբեք տանից դուրս չէր գա: Մանվելի անձը վերջացած է և վաղուց է վերջացած, երբ նրան ապրիլյան դեպքերից հետո Հադրութից քշեցին: Մանվելն այն ժամանակ արդեն իշխող վերնախավի համար պիտանի չէր, որովհետև դադարել էր հարվածող մուրճ լինելուց: Մանվելն այլևս վտանգ չէ։
-Երբ ասում եք, որ պետք է կոմպլեկտ գնահատական տրվի, ի՞նչ նկատի ունեք, կմանրամասնե՞ք:
-Երեք նախագահները պետք է պատասխանատվության ենթարկվեն և այդ կոնտեքստում նաև Մանվելը:
-Խոսակցություններ են շրջանառվում, որ այդ «տուշոնկաների» հետ Մանվել Գրիգորյանն առնչություն չի ունեցել, դուք դա հնարավոր համարո՞ւմ եք:
-Ես, իմանալով և ճանաչելով Մանվել Գրիգորյանին, կարող եմ ասել, որ առանց Մանվելի իմացության իր տարածքներում ճանճն անգամ չէր կարող թռնել, բայց նորից եմ ասում՝ հարցը «տուշոնկան» չէ, որովհետև դա կարելի է ներել, որովհետև ավելի շատ բարոյական հարց է, քան քրեական, բայց մյուս հանցանքները չի կարելի: Այժմ հակառակն է՝ ներվում են մյուս հանցանքները, մեջտեղ է բերվում «տուշոնկան»:
Շողիկ Գալստյան
