Շիրակի պետհամալսարանը նոր ռեկտոր կունենա․ կրքերը, սակայն, դեռ չեն հանդարտվում

Շիրակի պետական համալսարանի ռեկտորի շուրջ ստեղծված իրավիճակը, կարծես թե, հանգուցալուծվում է։ Ռեկտորի թափուր պաշտոնի համար կանցկացվի մրցույթ։ Այն տեղի կունենա մարտի 2-ին, դիմումների ընդունման վերջնաժամկետն էլ փետրվարի 22-ն է։ Նման որոշում է ընդունել ՇՊՀ-ի հոգաբարձուների խորհուրդը, որի նիստը կայացել է հունվարի 19-ին։

Այժմ ռեկտորի ժամանակավոր պաշտոնակատարը Երվանդ Սերոբյանն է։ Շիրակի պետական համալսարանի ռեկտորի պաշտոնը թափուր էր մնացել այն բանից հետո, երբ 2018թ-ի մայիսի 18-ին հանրապետական նախկին ռեկտոր Սահակ Մինասյանը հրաժարական տվեց։

Հիշեցնենք, որ բուհի երկու դասախոսներ` Գագիկ Համբարյանն ու Հովհաննես Խորիկյանը, վերջինիս մեղադրում էին չարաշահումների համար։ Ռեկտորի ընտրություններին ընդառաջ էլ Սահակ Մինասյանը փորձում է բուհում իր աջակիցների միջոցով տապալել նոր ռեկտորի ընտրությունը կամ իր նախընտրելի թեկնածուին առաջ տանել։ Այս մասին իր ֆեյսբուքյան էջում գրել է բուհի դասախոս Գագիկ Համբարյանը։

«Հիմա արդեն Սահակ Մինասյանը նոր մարտավարություն կդրսևորի… Համաձայն պլան մաքսիմումի` կփորձի Հոգաբարձուների խորհրդում իր կողմից վերահսկվող ձայներին գումարել 1 կամ 2 անկախ պատվիրակների ձայնը և ՇՊՀ-ի ռեկտորի պաշտոնում ընտրել մեկին, ով կլինի իր անձնական օգտագործման ռեկտորը… Սպասվող ընտրություններին ընդառաջ Մինասյանը և իր ֆան-ակումբի ներկայացուցիչները կփորձեն մաքսիմալ օգտագործել իրենց կապերը Հոգաբարձուների խորհրդում անկախ ներկայացուցիչներից մի երկուսին իրենցով անելու համար… Պլան մինիմումի համաձայն էլ` Մինասյանը կփորձի տապալել ՇՊՀ-ի ռեկտորի ընտրությունները (որևէ թեկնածու չի հավաքի 50 տոկոս + 1 ձայն) և ռեկտորի ընտրությունները կրկին կհետաձգվեն.. Սահակ Մինասյանի ամենագլխավոր խնդիրը ՇՊՀ-ում՝ «կյանքի գնով» անկախ աուդիտ անցկացնելու չեղարկումն է, որը կարող է բացահայտել նրա կատարած բոլոր հանցագործությունները..»,- գրում է Գագիկ Համբարյանը։

Մեր ունեցած տեղեկությունների համաձայն՝ ՇՊՀ ռեկտորի հավանական թեկնածուներից մեկն էլ Հումանիտար գիտությունների և արվեստի ֆակուլտետի դեկան Թամարա Մելիքյանն է, որը, ըստ շրջանառվող լուրերի, նախկին ռեկտորի աջակիցներից է։ Թամարա Մելիքյանը ԱԺ ՀՀԿ խմբակցության նախկին պատգամավոր Նաիրա Կարապետյանի մայրն է։

Էմմա Չոբանյան