Սամվել Ալեքսանյանը գնացել է և իր հետ տարել սենյակի բանալին. «Իմ քայլի» պատգամավորը դրսում է մնացել

Ազգային ժողովի պատգամավորների աշխատասենյակների հարցը վերջնական չի լուծվում: Ավելին՝ գնալով ավելի ինտրիգային է դառնում: Պատգամավորներին, թեև, բաժանվել են աշխատասենյակներ, սակայն, նրանք չեն կարողանում դրանք օգտագործել ըստ անհրաժեշտության:

«Իմ քայլը» խմբակցության պատգամավորներից Թագուհի Ղազարյանը մեզ հետ զրույցում ասաց, որ իրեն բաժին հասած աշխատասենյակի բանալին չկա, նախկին գումարման պատգամավորը այն տարել իր հետ:

«Բանալին չկա, սենյակը բացել չի լինում: Վիճակահանությամբ եմ սենյակը ստացել, բայց այն սենյակը, որ ինձ հասել էր, դրա բանալին չկա: Սենյակի նախկին տերը տարել է, չի հանձնել, չգիտեմ»,- ասաց Թագուհի Ղազարյանը:

Պատգամավորի խոսքով՝ իրեն բաժին է հասել 245 համարի աշխատասենյակը:

Տեղեկացնենք, որ այն նախկինում զբաղեցնում էր ՀՀԿ-ական Սամվել Ալեքսանյանը:

Ազգային ժողովի գործերի կառավարչությունից մեզ փոխանցեցին, որ այդ աշխատասենյակը երեք սենյականոց էր: Այսինքն՝ ուներ ընդունարան և երկու առանձին սենյակներ: Դրանք նախկինում այդպես բաժին էին հասել Ալեքսանյանին, իսկ հիմա «Իմ քայլի» երկու պատգամավորների: Նորընտիր պատգամավորներից մեկն արդեն տեղավորվել է, իսկ Թագուհի Ղազարյանը սպասում է, որ բանալին բերեն կամ փականը փոխեն:

«Իմ քայլի» մեկ այլ պատգամավորի՝ Սոս Ավետիսյանին էլ բաժին է հասել 412 աշխատասենյակը, որտեղ, սակայն, այժմ տեղակայված են ԱԺ պաշտպանության և անվտանգության հանձնաժողովի փորձագետները: Պատգամավորը ևս «դրսում է մնացել»: «Ես այդ սենյակ դեռ չեմ մտել, թեև սենյակի կարիքը դեռ չի զգացվում»,- ասում է նա:

Արդեն տեղեկացրել էինք, որ աշխատասենյակ ստացած պատգամավորները կահավորման ակտիվ  գործընթաց են սկսել:

Հայկ Վարդանյան