24.11.2024 | 17:00
Ֆրանսիայի Բրոն համայնքում Մեղրի քաղաքի պուրակ է բացվել
«Շաթդաունի» հետևանքները. ԱՄՆ պատվիրակությունը չի մասնակցի Դավոսի Տնտեսական համաժողովին
Քաղաքականություն
18.01.2019 | 12:09
ԱՄՆ նախագահ Դոնալդ Թրամփը չեղարկել է ամերիկյան պատվիրակության այցը Դավոս: Վաշինգտոնի ներկայացուցիչները Համաշխարհային տնտեսական համաժողովին չեն մասնակցի «շաթդաունի»՝ ԱՄՆ կառավարության գործունեության մասնակի կասեցման պատճառով: Այս մասին գրում է Ինտերֆաքսը՝ վկայակոչելով Սպիտակ տան հաղորդագրությունը:
Նախապես ծրագրվում էր, որ Դավոսում ԱՄՆ պատվիրակությունը կղեկավարի հենց Թրամփը, հետո, սակայն, ծրագիրը փոխվեց: Որոշվեց, որ պատվիրակությունը կղեկավարեն ֆինանսների նախարար Սթիվեն Մնուչինն ու պետքարտուղար Մայք Պոմպեոն: Արդյունքում, սակայն, Վաշինգտոնից ոչ ոք չի մեկնի Շվեյցարիա:
ԱՄՆ կառավարության գործունեությունը մասնակի կասեցված է անցյալ տարվա դեկտեմբերի 22-ից: Պատճառը Մեքսիկայի հետ սահմանին պատի կառուցման ֆինանսավորման հետ կապված Թրամփի և օրենսդիրների տարաձայնություններն են:
Նշենք, որ այս տարի Դավոս չի մեկնի նաև Մեծ Բրիտանիայի վարչապետ Թերեզա Մեյը: Նա էլ իր խնդիրներն ունի՝ Brexit-ի հետ կապված չլուծված հարցեր, որոնց լուծումը մեծ աշխատանք է պահանջում:
Շաբաթվա սկզբին բրիտանական Համայնքների պալատը դեմ արտահայտվեց ԵՄ-ից Միացյալ Թագավորության դուրս գալու ծրագրին, որը Մեյը համաձայնեցրել էր Բրյուսելի հետ: Դրանից հետո գործադիրին անվստահություն հայտնելու քվեարկություն կազմակերպվեց, սակայն Մեյի կառավարությունը պահպանեց գործելու իրավունքը: Հիմա նա պետք է Brexit-ի հարցով նոր առաջարկ ներկայացնի: Արդեն հայտնի է, որ այն կքննարկվի հունվարի 29-ին:
