Հասարակություն
17.01.2019 | 13:49
Ռազմաբժշկական ծառայության կողմից արվում է առավելագույնը, որպեսզի հիվանդ կամ առողջական խնդիրներ ունեցող զորակոչիկները չհայտնվեն բանակում: Հունվարի 17-ին լրագրողների հետ հանդիպմանը վստահեցրեց ՀՀ ԶՈՒ ռազմաբժշկական վարչության պետ, գնդապետ Գայանե Հովհաննիսյանը:
«Առողջական այդ չափորոշիչները մեծ ազդեցություն են ունենում մարտական պատրաստվածության, ինչպես նաև մարտական հերթապահության կազմակերպման վրա: Մեր զինվորների առողջությունը մեզ համար կարևորագույնն է»,- հավելեց նա:
Գայանե Հովհաննիսյանը նաև նշեց, որ բանակում համաճարակային իրավիճակը վերահսկողության տակ է: «Մենք ամեն ինչ անում ենք՝ զորքի համաճարակային իրավիճակը կայուն պահելու համար: Պատրաստ ենք սեզոնային հիվանդություններին, ինչի համար նաև կանխարգելիչ աշխատանքներ են տարվում. մինչև զորակոչն ապագա զինվորները գրիպի դեմ պատվաստումներ են ստանում»,- ասաց գնդապետը:
Ինչ վերաբերում է զորակոչի տարիքի տղաների առողջական վիճակին ընդհանրապես. Գայանե Հովհաննիսյանի տեղեկացմամբ՝ վերջին տարիներին մեծացել է ողնաշարի, կեցվածքի խնդիրներով, տարբեր ալերգիաներով, տեսողության խնդիրներով և սիրտ-անոթային հիվանդություններով զորակոչիկների թիվը: Զորակոչիկների շուրջ 60 տոկոսի մոտ առողջական խնդիրներ հայտնաբերվում են, բայց, ըստ գնդապետի, այդ խնդիրների դեպքում բանակ զորակոչելը թույլատրվում է: Ամեն դեպքում, նման զորակոչիկների մի մասը որոշակի սահմանափակումներով ծառայություն է իրականացնում:
