08.08.2026 | 13:20
«Ծիրան» սուպերմարկետում հացի արտադրամասի գործունեությունը կասեցվել է՝ սանիտարական խախտումների պատճառով
«Սուրբ Աստվածամայր» ԲԿ-ում 6 ամսական երեխայի մահ է գրանցվել
16.01.2019 | 17:20
«Սուրբ Աստվածամայր» բժշկական կենտրոնում երեկ կեսգիշերին 6 ամսական երեխայի մահվան դեպք է գրանցվել։ Այս մասին տեղեկացանք ֆեյսբուքյան օգտատեր Ռոբերտ Գևորգյանի գրառումից, որտեղ մասնավորապես նշվում էր․«Ամեն օր հիվանդանոցում 3 երեխա է մահանում, դեղ չունեն, որ երեխաներին բուժեն, որից մի երեխա՝ 6 ամսական, այսօր մահացավ․ իմ հարազատներից մեկի երեխան ու ոչ մի տեղ չի լուսաբանվում ։ Ի՞նչ է կատարվում, դեղ չունեն՝ ասում են դրսից ասեք բերեն, դեղը մինչև գտնում են, մինչև տեղ ա հասնում ՝ արդեն ուշ ա»։
Դեպքի մանրամասները պարզելու համար կապ հաստատեցինք «Սուրբ Աստվածամայր» բժշկական կենտրոն։ Տնօրեն Նիկոլայ Դալլաքյանը նշեց, որ երեխայի մոտ վիրուսային ախտահարում չի եղել, մահվան պատճառն այլ է։ Երեխային բժշկական կենտրոն են տեղափոխել արդեն ծանր վիճակում։ Երեք օր ջերմել է, վերջույթները պարալիզված են եղել։
Այնուամենայնիվ, նշենք, որ հանրապետությունում սուր շնչառական վարակներով (ՍՇՎ) հիվանդացությունը վերջին շրջանում աճ է գրանցել: Հունվարի 14-ի դրությամբ՝ պոլիկլինիկական ծառայության դիմել է սուր շնչառական վարակներով 1080 հիվանդ, որի 95%-ը երեխաներ են:
Դալլաքյանի խոսքով՝ Առողջապահության նախարարության հատուկ լաբորատորիայում բուժզննում, մասնավորապես՝ տոմոգրաֆիա և վիրուսաբանական հետազոտություն անցկացնելուց հետո պարզել են, որ երեխան ուղեղի և ողնուղեղի բորբոքում է ունեցել, ինչն էլ պարալիճ (նյարդաբորբ) է առաջացրել։
Հունվարի 12-ի ուշ երեկոյան հիվանդանոց տեղափոխված երեխան, երեք օր բուժում ստանալուց հետո, մահացել է։
Նշենք, որ երեխայի մահվան մասին ահազանգած ֆեյսբուքյան օգտատերը, որը բողոքում էր խնդիրը չլուսաբանելուց, չնայած մեր բազմաթիվ խնդրանքներին, այդպես էլ չարձագանքեց։
Մենք փորձեցինք նաև Առողջապահության նախարարությունից պարզել, թե ինչպիսին է մանկական մահացության վերջին երկու ամիսների վիճակագրությունը։ Այդ նպատակով կապ հաստատեցինք Առողջապահության նախարարության Մոր և մանկան առողջության պահպանման վարչություն, ինչպես նաև հասարակայնության հետ կապերի բաժին, սակայն մեզ պատասխանեցին, որ իրենք չունեն ոչ միայն 2019 թ․ կես ամսվա վիճակագրությունը, այլև դեռ չեն ամփոփել 2018թ․ մանկական մահացության վիճակագրական տվյալները։
Նելլի Մելքոնյան
