Նոր պատգամավորները սկսել են կահավորել իրենց սենյակները. Լիլիթ Մակունցն աշխատասենյակ չունի. ՏԵՍԱՆՅՈւԹ

Ազգային ժողովի պատգամավորներն արդեն ստացել են աշխատասենյակներ: «Իմ քայլը» խմբակցության պատգամավորներին աշխատասենյակներ են տրվել ԱԺ-ի այն մասնաշենքերում, որտեղ նախկինում ՀՀԿ-ականներն էին: ԲՀԿ-ականներն իրենց նախկին տեղում են, իսկ «Լուսավոր Հայաստան» կուսակցության պատգամավորները հանգրվանել են «Ելք» խմբակցության նախկին տեղում:

Այսօր Factor.am-ը ֆիքսել է, թե ինչպես են նոր պատգամավորներն ԱԺ-ից ստացած գույքը տանում իրենց սենյակներ:

«Իմ քայլը» խմբակցության ղեկավար Լիլիթ Մակունցը Factor.am-ի հետ զրույցում ասաց, որ ինքը դեռ սենյակ չունի: «Նորմալ ենք նայում այդ հանգամանքին, քանի որ դեռ խնդիրներ կան սենյակների հանձնելու-ստանալու հետ կապված: Սենյակներ էլ կան, որոնցում գույք չկա»,- ասաց նա և նշեց, որ խմբակցությունում արդեն բաշխել են առկա աշխատասենյակները:

Մեր հարցին՝ իսկ ինչպե՞ս է աշխատասենյակները գույքով համալրվելու, արդյոք պատգամավորնե՞րն են բերելու, Լիլիթ Մակունցը պատասխանեց. «Իհարկե պատգամավորները չպետք է բերեն այդ գույքը, ենթադրվում է, որ սենյակները տրամադրվելու են աշխատանքային պայմաններով՝ լինելու է սեղան, աթոռ և այլն»:

Ի դեպ, այս օրերին, երբ պատգամավորների աշխատասենյակները չունեն համապատասխան կահավորում, նրանք ընդմիջումներին հավաքվում են բուֆետում կամ ճեպազրույցների համար նախատեսված 334 սենյակում:

Ավելի վաղ տեղեկացրել էինք, որ 6-րդ գումարման ԱԺ-ի պատգամավորները տանում են իրենց գույքը: Բանն այն է, որ նախկին պատգամավորները չէին հավանել ԱԺ-ի կողմից տրված հնամաշ գույքը և իրենց համար թանկարժեք գույք էին բերել:

Հայկ Վարդանյան