Մեքենաների մաքսազերծման արժեքը զգալիորեն նվազել է. Դավիթ Անանյան. ՏԵՍԱՆՅՈՒԹ

Հունվարի 1-ից Հայաստան ներկրված ավտոմեքենաների մաքսազերծման գործընթացում ոչինչ չի փոխվել, պարզապես նոր գործիք ենք կիրառել: Հունվարի 16-ին հրավիրված մամուլի ասուլիսում այս մասին տեղեկացրեց Պետեկամուտների կոմիտեի (ՊԵԿ) նախագահ Դավիթ Անանյանը:

«Հանրության մոտ տպավորություն կար, որ հունվարի 1-ից երրորդ երկրից ներկրվող ավտոմեքենաների համար այլևս չենք կիրառելու ինվոյսը չենք համարելու որպես մաքսային ձևակերպման հիմք: Եվ դա տարընկալման արդյունք էր: Մեկ անգամ ևս ուզում եմ վերահաստատել, որ որևէ բան չի փոխվել: Մենք նախորդ տարվա մայիսից անցում կատարեցինք ինվոյսային արժեքի: Արդյունքում, 2018 թվականի երկրորդ կիսամյակից սկսած, կարելի է ասել, որ մեկ մեքենայի մաքսազերծման արժեքն էականորեն նվազել է, որը արդյունք է նրա, որ մենք ոչ թե մաքսային արժեք ենք կիրառել, այլ կիրառել ենք ինվոյսային արժեք»,- նշեց նա:

Դավիթ Անանյանի խոսքով՝ այն անձինք, ովքեր մեքենա են ձեռք բերել դրսում և ունեն արժանահավատ ինվոյս՝ ձեռքբերման փաստաթուղթ, որևէ խնդիր չունեն. արժանահավատ գնահատվող ինվոյսի հիման վրա կատարվելու է մաքսային ձևակերպում:

«Ուղղակի մեր քաղաքացիները, որպեսզի ունենային շատ ավելի «բարենպաստ» արժեք մաքսային ձևակերպման համար, զանազան կազմակերպությունների միջոցով փորձում էին ձեռք բերել ոչ արժանահավատ ինվոյսներ: Մեր կայքէջում մի գործիք ներդրեցինք, որպեսզի մեր քաղաքացիները այդ քայլի գնալուց առաջ, ներմուծելով իրենց մեքենայի համապատասխան տվյալները, ստանան այն արժեքը, որով ինվոյսի բացակայության պայմաններում իրականացվելու է մաքսային ձևակերպումը: Շատ դեպքերում մենք զերծ ենք պահել մեր քաղաքացիներին ոչ արժանահավատ ինվոյսներ ձեռք բերելու առումով»,- հավելեց ՊԵԿ նախագահը:

Մանրամասները՝ տեսանյութում