08.08.2026 | 15:38
Ողջույն Հայաստան. NVIDIA-ի հիմնադիր Ջենսեն Հուանգը շնորհավորել է Firebird-ի ԱԲ գործարանի բացման առիթով
Հրանտ Մարգարյանը չի առաջադրվելու ՀՅԴ Բյուրոյի ղեկավարի պաշտոնում
Քաղաքականություն
16.01.2019 | 14:17
Հրանտ Մարգարյանը, 19 տարի ՀՅԴ-ն ղեկավարելուց հետո, որոշել է չառաջադրվել Բյուրոյի ներկայացուցչի պաշտոնում: Այս մասին Դաշնակցության ղեկավարը հայտարարել է Արցախում մեկնարկած ՀՅԴ 33-րդ Ընդհանուր ժողովի բացման ժամանակ:
Նա ընդգծել է, որ իր այս որոշումը ո՛չ նահանջ է, ո՛չ էլ պարտություն, որովհետև չի հեռանում կուսակցության աշխատանքներից ու ընդհանուր պայքարից:
«Ինչպես ցանկացած շարքային գիտակից դաշնակցական՝ ես էլ մշտապես իմ անձը ստորադասել եմ կուսակցությանը, և այլ կերպ չէր էլ կարող լինել: Ուժեղ եմ եղել Դաշնակցությամբ, խորիմաստ եմ եղել Դաշնակցությամբ, ամուր եմ եղել Դաշնակցությամբ: Այսօր հայտնվել ենք մի հանգրվանում, ուր վերադիրքավորվելու անհրաժեշտություն կա: Այդ վերադիրքավորման համար անհրաժեշտ են նաև որոշակի փոփոխություններ: Եվ առաջին փոփոխությունը, որն առաջարկում եմ, ինձանից սկսելն է: Ուստի գալիս եմ ամենայն լրջությամբ ու պատասխանատվությամբ, առանց դույզն իսկ չափով նեղվածության հայտարարելու՝ իմ թեկնածությունը չեմ դնելու Բյուրոյի կազմի ընտրությունների ժամանակ: Նախապես հայցում եմ բոլոր ընկերների, որոնք վստահ եմ այս ժողովում և կազմակերպության մեջ ծանրակշիռ ներկայություն են, ներողամտությունը: Իմ որոշումը ո՛չ նահանջ է, որովհետև չեմ հեռանում աշխատանքներից ու մեր ընդհանուր պայքարից, ո՛չ պարտություն է, որովհետև չեմ պարտվել, ո՛չ հոգնածություն է, որովհետև իրավունք չունենք հոգնելու, այլ պարզապես մարտավարական ճկունություն է»,- շեշտել է Հրանտ Մարգարյանը:
